අනිවාර්‍යය රාජකාරි නිවාඩු යවා සිටින පොලිස්පති දේශබන්දු තෙන්නකෝන් ව අත් අඩංගුවට ගැනීමට අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායම් 15ක් යොදවා තිබෙනවා.
මෙම විමර්ශනය වැඩබලන පොලිස්පති ප්‍රියන්ත වීරසූරියගේ මූලිකත්වයෙන් සිදු කෙරෙන බවයි වාර්තා වන්නේ.
කෙසේවෙතත් අදට (19) දින 19ක් ගත ව ඇතත් දේශබන්දු තෙන්නකෝන් ව සොයා ගැනීමට නොහැකි ව තිබෙනවා.
වැලිගම හෝටලයකට වෙඩි තැබීමේ සිද්ධියක් සම්බන්ධයෙනුයි දේශබන්දු තෙන්නකෝන් ව අත් අඩංගුවට ගැනීමට මාතර මහේස්ත්‍රාත් අධිකරණය මගින් නියෝගයක් නිකුත් කරනු ලැබුවේ.
ඊයේ (18) පස්වරුවේ ද අපරාධ පරීක්ෂණ දෙපාර්තමේන්තුවේ නිලධාරීන් දේශබන්දු මහතාගේ නැගෙනහිර හෝකන්දර පිහිටි නිවසට ගොස් පරීක්ෂා කිරීමේ දී එහි තිබී විදෙස් මත්පැන් බෝතල් 120ක් ඇතුළු තවත් සැක කටයුතු භාණ්ඩ රැසක් ද සොයාගෙන තිබෙනවා.
එමෙන්ම දේශබන්දු තෙන්නකෝන්ගේ දේපොළ හඳුනාගැනීම සහ ඒ සම්බන්ධයෙන් වන ලැයිස්තුගත කිරීමක් ද මේ වනවිට ආරම්භ කර ඇති බවයි පැවසෙන්නේ.
මේ අතර කිරිබත්ගොඩ පිහිටි රජයට අයත් ඉඩමක් ව්‍යාජ ඔප්පු සකසා විකිණීමේ චෝදනාවට මේ වනවිට රක්ෂිත බන්ධනාගාරගත කර සිටින හිටපු අමාත්‍ය මර්වින් සිල්වා මහතාට අදාළ නීතිවිරෝධී ක්‍රියාවට අනුබල දුන් චෝදනාවට හිටපු අමාත්‍ය ප්‍රසන්න රණවීරට ද උසාවියෙන් විදෙස් ගමන් තහනමක් පැනවූවා.
කෙසේවෙතත් ප්‍රසන්න රණවීර හෝ පසුගිය පෙබරවාරි මස 18 වැනිදා අලුත්කඩේ මහේස්ත්‍රාත් අධිකරණයේ දී වෙඩි තබා ඝාතනය කෙරුණු ගනේමුල්ල සංජීවට වෙඩි තැබීමට සහාය දුන් ඉෂාර සෙව්වන්දි ව හෝ මෙතෙක් අත්අඩංගුවට ගැනීමට ශ්‍රී ලංකා පොලිසියට හැකි ව නැහැ.
ඉෂාරා සෙව්වන්දි නමැති සැකකාරිණිය අතුරුදන් ව මේ වනවිට මාසයක් ගත වනවා.
එබැවින් දේශබන්දු තෙන්නකෝන්, ඉෂාරා සෙව්වන්දි සහ ප්‍රසන්න රණවීර සොයා ද පොලිස් මෙහෙයුම් ක්‍රියාත්මකයි.
මෙම සිදුවීම සම්බන්ධයෙන් කැබිනට් මාධ්‍ය ප්‍රකාශක නලින්ද ජයතිස්ස ඊයේ (18) පැවසුවේ අභියාචනාධිකරණය දුන් තීන්දුව වටිනා බවත්, දේශබන්දු තෙන්නකෝන්ට රැකවරණය දෙන සියලු ම දෙනා අත්අඩංගුවට ගැනීමට කටයුතු කරන ලෙස නියෝග කර ඇති බවයි.
එමෙන්ම මෙම සැකකරුවන් තිදෙනා ගැන යම් තොරතුරක් වෙතොත් පොලිසියට දැනුම්දෙන ලෙසට ද මහජනතාවගෙන් ඉල්ලීමක් කර තිබෙනවා.
