සෞඛ්‍ය වෘත්තීයවේදීන්ගේ සම්මේලනය අද (18) උදෑසන 7.00 සිට දිවයින පුරා සියලු රෝහල්වල සංකේත වැඩවර්ජනයක් ආරම්භ කළා.
අයවැය මඟින් රජයේ පරිපූරක වෛද්‍ය වෘත්තීයවේදීන්ගේ දීමනා කප්පාදුවට එරෙහිව ඔවුන් මෙම පැය 24ක වැඩවර්ජනය ආරම්භ කළේ මුදල් අමාත්‍යාංශයේ නිලධාරීන් සමඟ ඊයේ (17) පැවති සාකච්ඡා අසර්ථක වීමත් සමඟයි.
පරිපූරක වෛද්‍ය වෘත්තීයවේදීන්ගේ ඒකාබද්ධ බලමණ්ඩලයට අයත් වෘත්තීය සමිති 07ක් සහ අතුරු වෛද්‍ය සේවා ඒකාබද්ධ පෙරමුණට අයත් වෘත්තීය සමිති 11ක් මෙම වැඩවර්ජනය සඳහා එක්ව සිටිනවා.
කෙසේ වෙතත් වැඩ වර්ජනය සිදුකරන කාලය තුළ සියලුම හදිසි සහ අත්‍යවශ්‍ය සේවා සපයන බවයි සෞඛ්‍ය වෘත්තීයවේදීන්ගේ සම්මේලනය සඳහන් කළේ.
එමෙන්ම ළමා රෝහල්, මාතෘ රෝහල්, පිළිකා රෝහල් සහ වකුගඩු රෝහල්වල හෙට දිනයේ දී මෙම වර්ජනය ක්‍රියාත්මක නොවන බව ද ඔවුන් සඳහන් කර සිටියා.
මේ අතර තැපැල් වෘත්තීය සමිති ආරම්භ කර ඇති වැඩවර්ජනය අද (18) දිනයේත් ක්‍රියාත්මක කරන බව ඒකාබද්ධ තැපැල් වෘත්තීය සමිති පෙරමුණ පවසනවා.
ඉල්ලීම් කිහිපයක් මුල්කර ගනිමින් තැපැල් වෘත්තීය සමිති මෙලෙස පැය 48ක වෘත්තීය ක්‍රියාමාර්ගයකට එළඹ සිටිනවා.
