ප්‍රමිතියෙන් තොර ප්‍රතිදේහ එන්නත් මිල දී ගැනීමේ සිද්ධිය සම්බන්ධයෙන් තමන්ව නඩු විභාගය අවසන් වන තෙක් රක්ෂිත බන්ධනාගාර ගත කිරීම අභියෝගයට ලක්කරමින් සෞඛ්‍ය අමාත්‍යාංශයේ හිටපු අතිරේක ලේකම් සමන් රත්නායක මහතා විසින් ගොනු කර තිබූ මුලික අයිතිවාසිකම් පෙත්සම ශ්‍රේෂ්ඨාධිකරණය නිෂ්ප්‍රභ කළා.
එකී සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනය කිරිමෙන් අනතුරුව තමාව අත්අඩංගුවට ගෙන අධිකරණයට ඉදිරිපත් කර රක්ෂිත බන්ධනාගාරගත කිරීම නීතිවිරෝධී බවත් එමගින් තමන්ගේ මුලික අයිතිවාසිකම් උල්ලංඝනය වූ බවට නිගමනය කරන ලෙස පෙත්සම්කරු අධිකරණයෙන් ඉල්ලා සිටියා.
එම පෙත්සම කුමුදිනී වික්‍රමසිංහ, ගාමිණී අමරසේකර සහ සෝභිත රාජකරුණා යන අයගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබුවා.
නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ලක්මිණි ගිරිහාගම මෙනවිය සඳහන් කළේ පෙත්සම්කරු අත්අඩංගුවට ගෙන ඇත්තේ නීත්‍යානුකූල ලෙස විමර්ශනයක් සිදු කිරිමෙන් අනතුරුව බවත් රක්ෂිත බන්ධනාගාරගත කරන ලද්දේ ද නීත්‍යනුකූල අයුරින් බවයි.
ඉදිරිපත් වූ සියලු කරුණු සලකා බැලූ විනිසුරු මඩුල්ල නිගමනය කළේ පෙත්සම්කරු අත්අඩංගුවට ගෙන රක්ෂිත බන්ධනාගාර ගත කරන ලද්දේ නීත්‍යනුකූල ව බවයි.
එබැවින් පෙත්සම නිෂ්ප්‍රභ කරන ලෙස විනිසුරු මඩුල්ල නියෝග කළා.
