වත්තල ප්‍රදේශයේ දී පැහැරගෙන යමින් තිබූ ලොරි රථයකට පොලිසිය විසින් වෙඩි තබා නවතාගෙන එම රථය පැහැරගත් සැකකරු අද (01) අලුයම අත්අඩංගුවට ගෙන තිබුණා.
කඩුවෙල මහේස්ත්‍රාත් අධිකරණය අසල දී ලොරියට වෙඩි තබා එය නතර කර ගැනීමට පොලිසියට හැකිව ඇති අතර, අත්අඩංගුවට ගැනුණු සැකකරු සන්තකයේ තිබී අත් බෝම්බයක් ද සොයාගෙන ඇති බවයි වාර්තා වුණේ.
අදාළ ලොරි රථය නොරොච්චෝලේ සිට සුපිරි වෙළඳසැලක් සඳහා එළවළු පටවා ගෙන එන අතර තුර; වත්තල ප්‍රදේශයේ තේ කඩයක් අසල රථය නවතා එහි රියදුරු තේ පානයට ගොස් තිබෙනවා.
එම අවස්ථාවේ දී පුද්ගලයෙක් විසින් ලොරි රථය පැහැරගෙන ඇති අතර, ලොරි රථයේ රියදුරු විසින් ත්‍රීරෝද රථයකින් ලොරි රථය පිටුපස හඹා ගියද එය අල්ලා ගැනීමට හැකියාව ලැබී නැහැ.
ඒ අනුව සිද්ධිය පිළිබඳව පොලිසිය දැනුවත් කිරීමට කටයුතු කර ඇති අතර, ලොරි රථයේ සවිකර ඇති GPS උපකරණයෙන් රථය ගමන් ගන්නා මාර්ගය පිළිබඳව දැනුවත් කිරීමටයි එහි හිමිකරුවන් කටයුතු කර ඇත්තේ.
ඒ අනුව වැල්ලම්පිටිය ප්‍රදේශයේදී අදාළ ලොරි රථය නැවැත්වීමට පොලිසිය උත්සාහ ගත්තද එය ව්‍යාර්ථ වී ඇති අතර, පසුව කඩුවෙල දෙසට පැමිණි අවස්ථාවේ දී පොලිස් කණ්ඩායම කිහිපයක් රථය පසුපස හඹා ගොස් තිබෙනවා.
එහිදී තලාහේන ප්‍රදේශයේ දී සහ කඩුවෙල ප්‍රදේශයේ දී වෙඩි පහර කිහිපයක් ලොරි රථයට එල්ල කර ඇති අතර, මෝටර් රථ දෙකක් බස් රථයක් සහ ත්‍රීරෝද රථයක් ද අනතුරට ලක්කර ඉසුරුපාය අධ්‍යාපන අමාත්‍යාංශයේ පිටුපස ගේට්ටුවකටද හානි කරමින් ලොරි රථය පලා ගිය බවයි පොලිසිය සඳහන් කළේ.
පසුව කඩුවෙල නගරයේදී වෙනත් ලොරි රථ යොදා ගනිමින් මාර්ගය හරස් කර බාධක යොදා තිබූ අවස්ථාවේදී, ලොරි රථය එම ස්ථානයෙන් නැවත හැරී යාමට සැරසුණු අවස්ථාවේ දී පොලිසිය විසින් වෙඩි පහර තිහකට ආසන්න ප්‍රමාණයක් එල්ල කර තිබෙනවා.
ඒ, අනුව රථය නවතා ගැනීමට පොලිසියට හැකියාව ලැබී ඇති අතර, කඩුවෙල අධිකරණය අසල දී රථය දමා සැකකරු පළායන අවස්ථාවේ දී ඔහුව අල්ගිලා ගැනීමට පොලිසියට හැකියාව ලැබී තිබෙනවා.
මෙලෙස අත්අඩංගුවට ගෙන ඇත්තේ කැලණිය තියාරිය ප්‍රදේශයේ පදිංචිකරුවකු වන 25 හැවිරිදි මොහොමඩ් ආදිල් බාවන් නැමැති පුද්ගලයෙක්.
සැකකරු අද (01) කඩුවෙල මහේස්ත්‍රාත් අධිකරණය වෙත ඉදිරිපත් කිරීමට නියමිත බවයි පොලිසිය සඳහන් කළේ.
