දකුණේ ක්‍රියාත්මක අපරාධ කල්ලි සාමාජිකයින් සඳහා විවිධ අපරාධ සිදුකිරීමට යතුරුපැදි සොරකම් කළ අයෙක්
අත්අඩංගුවට ගත් බව කළුතර කොට්ඨාස අපරාධ විමර්ශන ඒකකය සඳහන් කරනවා.
මෙලෙස අත්අඩංගුවට ගෙන ඇත්තේ ‘ගාල්ලේ ගඩ්ඩා’ යන අනවර්ථ නාමයෙන් හඳුන්වන අයෙක් වන අතර, එහිදී සොරකම් කළ යතුරුපැදි හතරක් ද සොයාගෙන තිබෙනවා.
යතුරුපැදි සොරාගන්නා අයෙක් කළුතර, පන්විලහේන වත්ත ප්‍රදේශයේ සැරිසරන බවට ලද තොරතුරක් මත සිදුකළ විමර්ශනවල දී සැකකරු අත්අඩංගුවට ගැනීමට හැකිව ඇති බවයි වාර්තා වුණේ.
එහිදී සැකකරුගෙන් කළ ප්‍රශ්න කිරීම්වල දී ගාල්ල, අහුංගල්ල සහ කළුතර ප්‍රාදේශවල සඟවා තිබූ යතුරුපැදි හතර සොයාගැනීමට හැකිව තිබෙනවා.
සැකකරු විසින් සොරකම් කරන ලද යතුරුපැදි මංකොල්ලකෑම්, පුද්ගල පහරදීම් සහ මනුෂ්‍ය ඝාතන සිදුකිරීම සඳහා දකුණේ ප්‍රධානතම අපරාධ කල්ලි සාමාජිකයන් වෙත ලබා දී ඇති බවයි අනාවරණය වී ඇත්තේ.
අත්අඩංගුවට ගැනුණු සැකකරුට එරෙහිව පුද්ගල පහරදීම් මත්ද්‍රව්‍ය ජාවාරම සහ සොරකම් සම්බන්ධයෙන් මීට පෙර දිවයිනේ විවිධ අධිකරණවල නඩු පවතින බවයි පොලිසිය සඳහන් කළේ.
සැකකරු අද (12) දින කළුතර මහේස්ත්‍රාත් අධිකරණයට ඉදිරිපත් කිරිමට නියමිතයි.
