මහජන චීන විමුක්ති හමුදාවේ යුද නෞකාවන් වන “HE FEI”, “WUZHISHAN” සහ “QILIANSHAN” යන යුද නෞකා ත්රිත්වය නිල සංචාරයක් සඳහා අද (26) උදෑසන කොළඹ වරායට පැමිණි අතර, ශ්රී ලංකා නාවික හමුදාව විසින් එම නෞකාවන් නාවික හමුදා සම්ප්රදායානුකුලව පිළිගැනීමට කටයුතු කර තිබෙනවා.
මෙලෙස කොළඹ වරායට සේන්දු වූ Destroyer වර්ගයට අයත් “HE FEI” යුද නෞකාව, දිගින් මීටර් 144.50 හා නැව් මුළුව 267කගෙන් සමන්විතයි.
එම නෞකාවේ අණදෙන නිලධාරී ලෙස කපිතාන් Chen Junfeng කටයුතු කරනු ලබනවා.
Landing Platform Dock වර්ගයට අයත් “WUZHISHAN” යුද නෞකාව දිගින් මීටර් 210 හා නැව් මුළුව 872කගෙන් සමන්විත වන අතර, එම නෞකාවේ අණදෙන නිලධාරී ලෙස කපිතාන් Fei Zhang කටයුතු කරනවා.
Landing Platform Dock වර්ගයට අයත් “QILIANSHAN” යුද නෞකාව දිගින් මීටර් 210 හා නැව් මුළුව 334 ක ගෙන් සමන්විතයි.
එහි නෞකාවේ අණදෙන නිලධාරී වන්නේ කපිතාන් Xiong Binghon.
මෙම නෞකා ත්රිත්වයේ අණදෙන නිලධාරීන් සහ බටහිර නාවික විධානයේ ආඥාපති රියර් අද්මිරාල් චින්තක කුමාරසිංහ අතර නිල හමුවක් අද දින බටහිර නාවික විධාන මූලස්ථානයේදී පැවැත්වීමට නියමිතව ඇති අතර, දෙරටේ නාවික හමුදාවන්ගේ සුහදත්වය වැඩිදියුණු කිරීම වෙනුවෙන් ශ්රී ලංකා නාවික හමුදාව විසින් සංවිධානය කරනු ලබන විවිධ වැඩසටහන් සඳහා එම නෞකාවන්ගේ නැව් මුළුවන් සහභාගී වීමට ද නියමිතව තිබෙනවා.
එමෙන්ම, “HE FEI”, “WUZHISHAN” සහ “QILIANSHAN” යන යුද නෞකා ත්රිත්වය මෙරට රැඳී සිටින කාලසීමාව තුළ එම නෞකාවන්ගේ නැව් මුළුවන් දිවයිනේ වැදගත් ස්ථාන නැරඹීම සඳහා ප්රදේශ කිහිපයක සංචාරය කිරීමට නියමිත බවත් වාර්තා වනවා.
නෞකාවන්ගේ මෙහෙයුම් ක්රියාකාරිත්වය පිළිබඳව ශ්රී ලංකා නාවික හමුදා පුද්ගලයන් දැනුවත් කිරීමේ වැඩසටහනක් එම නෞකා තුළ පැවැත්වීමට ද නියමිතයි.
බටහිර නාවික විධාන මුහුදු තීරයේදී ශ්රී ලංකා නාවික හමුදා නෞකාවක් සමඟ සිදු කෙරෙණ පුහුණු අභ්යාසයකින් (PASSEX) අනතුරුව, මෙම නිල සංචාරය අවසන් කරමින් “HE FEI”, “WUZHISHAN” සහ “QILIANSHAN” යුද නෞකා ත්රිත්වය 2024 අගෝස්තු මස 29 වන දින දිවයිනෙන් පිටත්ව යාමට නියමිතව තිබෙන බවත් ශ්රී ලංකා නාවික හමුදා මාධ්ය අංශය පවසනවා.
