විශ්මිගේ ශතකය අපතේ යයි – අයර්ලන්ත ක්‍රීඩිකාවන්ට තියුණු ජයක්

අයර්ලන්ත කාන්තා කණ්ඩායම සමඟ ඊයේ (16) පැවති පළමු එක්දින තරගයෙන් ශ්‍රී ලංකා ක්‍රීඩිකාවන්ට කඩුලු 03ක පරාජයක් අත්විදීමට සිදු වුණා.

අයර්ලන්තයේ බෙල්ෆාස්ට් හි පැවති මෙම තරගයේ අයර්ලන්ත ආරාධනයෙන් පළමුව පන්දුවට පහර දුන් ශ්‍රී ලංකා ක්‍රීඩිකාවන් පන්දුවාර 50 තුළ කඩුලු 08ක් දැවී ලකුණු 260ක් රැස් කිරීමට සමත් වුණා.

එහිදී ශ්‍රී ලංකාව වෙනුවෙන් විශිෂ්ට ඉනිමක් ක්‍රීඩා කළ විශ්මි ගුණරත්න සිය මංගල ජාත්‍යන්තර එක්දින ශතක වාර්තා කරමින් ලකුණු 101ක් රැස් කළා.

අනතුරුව ලකුණු 261ක ඉලක්කයක් හඹා යාමට පිටියට පිවිසි අයර්ලන්ත ක්‍රීඩිකාවන් අදාළ ඉලක්කය පන්දුවාර 49යි පන්දු 02ක් තුළ කඩුලු 07ක් දැවී එම ඉලක්කය පසුකර ගියා.

අයර්ලන්ත පිළිතුරු ඉනිම වෙනුවෙන් ඔර්ලා ප්‍රෙන්ඩෙගාස්ට් සටන්කාමී ඉනිමක් දියත්කරමින් නොදැවී ලකුණු 122ක් රැස් කරමින් අයර්ලන්ත ජයග්‍රහණය තහවුරු කළා.

පන්දු යැවීමේ දී කවීෂා දිල්හාරි ලකුණු 54කට කඩුලු 04ක් බිඳ දැමුවා.

ඒ, අනුව අයර්ලන්ත ක්‍රීඩිකාවන්ට මෙම තරගයෙන් කඩුලු තුනක ජයක් හිමි වුණා.

අයර්ලන්ත හමුවේ ශ්‍රී ලංකා කාන්තා ක්‍රිකට් කණ්ඩායමක් එක්දින තරගයක් පරාජය වූ පළමු අවස්ථාව වීමද විශේෂත්වයක්.