සමාජ මාධ්‍යය ඉදිරියේ තම කුඩා දියණියට පරුෂ වචනයෙන් බැණ වැදී; හැරගිය බිරිඳ යළි ගෙන්වා ගැනීමට උත්සාහ කළ පුද්ගලයෙකු පොලිසිය අත් අඩංගුවට ගෙන තිබෙනවා.
මෙම සැකකාර පුද්ගලයාව අද (05) පස්වරුවේ අත් අඩංගුවට ගත් බවයි තඹුත්තේගම පොලිසිය පැවසුවේ.
සැකකරු විසින් සිය වයස අවුරුදු 06 පමණ වන දියණිය ව ළඟ තබා ගෙන අසභ්‍ය වචනවලින් බැණ වදින ආකාරයත්; පවුල් ආරවුලක් හේතුවෙන් මාස දෙකකට ආසන්න කාලයක සිට නිවසින් වෙන් ව ගොස් සිටින දරුවාගේ මවට ද මරණ තර්ජන එල්ල කරමින් මෙම පුද්ගලයා විසින් සිය ටික්ටොක් ගිණුමෙහි වීඩියෝ කිහිපයක් ම පළ කර තිබෙනවා.
ඔහු සඳහන් කරන පරිදි ඔහු එම වීඩියෝ පළ කර ඇත්තේ; සිය බිරිඳ කුමන අවස්ථාවක හෝ ඒවා නරඹයි යන අදහස පෙරදැරි කරගෙන බවයි වාර්තා වන්නේ.
කෙසේවෙතත් මෙම සැකකරුව අද පස්වරුවේ තඹුත්තේගම පොලිසිය විසින් අත් අඩංගුවට ගනු ලැබූ අතර හෙතෙම 27 හැවිරිදි මල්වානේගම- ඇල්ලෑව ගමේ පදිංචි ජයකොඩි ආරච්චිලාගේ සමන් කරුණාරත්න නමැති අයෙක්.
සැකකරුගේ බිරිඳ මැයි මස 24 වැනි දින පවුල් ආරවුලක් හේතුවෙන් ලිපියක් ලියා තබා නිවසින් පිටව ගොස් තිබෙනවා.
තම බිරිඳ නොමැති හේතුවෙන් මෙම සැකකාර පුද්ගලයා තම දරුවා සමග වීඩියෝ කර බිරිඳට හා දරුවාට පරුෂ වචනයෙන් බැණ; මරණ තර්ජනය කරන වීඩියෝ අන්තර්ජාලයේ ප්‍රචාරය කිරීමයි කටයුතු කර ඇත්තේ.
මෙම කුඩා දැරිවියගේ මව තමන් ව සහ දරුවා ව අතහැර ගොස් ඇති බවට සැකකරු විසින් පොලිසියට මීට පෙර පැමිණිල්ලක් ද සිදු කර තිබෙන බවත් පොලිසිය පැවසුවා.
සිද්ධිය පිළිබඳ ව වැඩිදුර තොරතුරු තඹුත්තේගම මූලස්ථාන පොලිසියේ පොලිස් පරීක්ෂක සාගර ලියනගේ මහතාගේ උපදෙස් මත ළමා හා කාන්තා කාර්යය අංශයේ නිලධාරීන් විසින් පවත්වනු ලබන බවයි අප ප්‍රාදේශීය වාර්තාකරු සඳහන් කළේ.
සැකකරු තඹුත්තේගම මහේස්ත්‍රාත් අධිකරණයට ඉදිරිපත් කිරීමට නියමිතයි.
