ඉන්දීය අග්‍රාමාත්‍ය නරේන්ද්‍ර මෝදි ලබන මාසයේ යුක්රේනයට පැමිණීමට ඉඩ ඇති බව එරට මාධ්‍ය වාර්තා කරනවා.
රුසියාව සමඟ යුද්ධය ආරම්භ වීමෙන් පසුව සහ මොස්කව්හිදී රුසියානු ජනාධිපති ව්ලැඩිමීර් පුටින් හමුවීමෙන් සති කිහිපයකට පසුව ඔහුගේ පළමු සංචාරය මෙය බවයි ප්‍රවෘත්ති වාර්තාවේ දැක්වුණේ.
නවදිල්ලියේ යුක්රේන තානාපති කාර්යාලය රොයිටර්ස් වෙත පවසා ඇත්තේ බෙදා ගැනීමට තොරතුරු නොමැති බවයි.
ඉන්දීය විදේශ අමාත්‍යාංශයෙන් ක්ෂණික ප්‍රතිචාරයක් නොමැති බව රොයිටර්ස් පවසනවා.
2022 දී යුක්රේනය මුළුමනින්ම ආක්‍රමණය කිරීමෙන් පසු බටහිර රටවල් මොස්කව් වෙත සම්බාධක පනවා ඇතත්, නමුත් ඉන්දියාව සහ චීනය වැනි “මිත්‍රශීලී” ජාතීන් දිගටම ඔවුන් සමග වෙළඳ ගනුදෙනුවල නිරත වනවා.
ඉන්දියාව, රුසියාවට සෘජුව දොස් පැවරීමෙන් වැළකී සිටින අතර, දෙරට අතර ගැටුම සංවාදයෙන් සහ රාජ්‍ය තාන්ත්‍රිකභාවයෙන් විසඳා ගන්නා ලෙස ඉල්ලා සිටිනවා.
මේ අතර යුක්රේනයේ සංස්කෘතික සහ තොරතුරු ප්‍රතිපත්ති පිළිබඳ නියෝජ්‍ය අමාත්‍ය Anastasia Bondar දිල්ලියේ දී WION සමඟ පැවති විශේෂ සම්මුඛ සාකච්ඡාවක දී අගමැති මෝදි තම රටට පැමිණීම පිළිබඳ සුබවාදී ප්‍රතිචාරයක් දක්වා තිබුණා.
“ඉන්දීය අග්‍රාමාත්‍යවරයා ඉතා ඉක්මනින් යුක්රේනයට පැමිණෙනු ඇතැයි මම පෞද්ගලිකව දැඩිව විශ්වාස කරනවා, ඔහුට යුක්රේනයේ දැන් සිදුවෙමින් පවතින තත්ත්වය පෙන්වීමට ඇති එකම ක්‍රමය මෙයයි..” එහිදී ඇය පවසනවා.
අමාත්‍යවරියා ඉන්දීය අගනුවරට පැමිණ සිටියේ ලෝක උරුම කමිටු රැස්වීම සඳහා වන අතර, එහිදී යුක්රේනයේ ඓතිහාසික ස්ථානවලට යුද්ධයේ බලපෑම පිළිබඳ යුක්රේනය අනුග්‍රහය දැක්වූ යෝජනා තුනක් ද සම්මත කර ගැණුනා.
