මෙරට ඩෙංගු රෝගීන්ගේ වාර්තා වීම සංඛ්‍යාත්මක ව ඉහළ ගොස් ඇති බව වාර්තා වනවා.
වසංගත රෝග විද්‍යා අංශය පෙන්වාදෙන පරිදි ගෙවුණු මාස හතරක කාලය තුළ වැඩිම ඩෙංගු රෝගීන් සංඛ්‍යාවක් වාර්තා වී ඇත්තේ; ජූලි මාසය තුළ බවයි වාර්තා වන්නේ.
ජූලි මාසය තුළ පමණක් ඩෙංගු වැළඳුණු රෝගීන් 3,944 දෙනෙකු හමු ව ඇති අතර; එය පෙර මාසවලට වඩා සාපේක්ෂ ව සැලකිය යුතු වර්ධනයක් පෙන්නුම් කරන බවයි.
ජුනි මාසයේ දී රෝගීන් 3,319 ක්, මැයි මාසයේ දී 2,647ක් සහ අප්‍රේල්වල දී 2,234 ක් රෝගීන් වාර්තා වූ අතර මාර්තු මාසයේ දී රෝගීන් 3,615 ක් වාර්තා වී තිබුණා.
2024 වසර සඳහා වාර්තා වූ සමුච්චිත ඩෙංගු රෝගීන් සංඛ්‍යාව 32,000 සීමාව ද මේ වනවිට ඉක්මවා ගොස් ඇති බවයි වසංගත රෝග විද්‍යා අංශය පෙන්වා දෙන්නේ.
ජූලි 27 වන විට, වර්ෂය සඳහා වූ මුළු රෝගීන් සංඛ්‍යාව 32,183ක්.
කොළඹ දිස්ත්‍රික්කයෙන් වැඩිම රෝගීන් සංඛ්‍යාවක් වාර්තා වී ඇති අතර එය ගණනින් 7,585ක්.
2024 මෙම වර්ෂයේ දී ඩෙංගු වැළඳීමෙන් රෝගීන් 31 දෙනෙකු ජීවිතක්ෂයට පත් ව ඇති අතර; වෛද්‍ය බලධාරීන් ඉල්ලා සිටියේ ඩෙංගු මර්දනය කිරීමට ජනතාව සිය නිවෙස් ඇතුළු ජීවත් වන පොදු පරිසරය වඩාත් සැලකිල්ලෙන් පිරිසිදු ව තබා ගත යුතු බවයි.
