රජයේ රැකියා සඳහා කෝටා ක්‍රමයට එරෙහි ව බංග්ලාදේශය පුරා විරෝධතාවයේ නිරත සිසුන් සහ රජයේ තරුණ ආධාරකරුවන් අතර ගැටුම් සහ පොලිසියේ කඳුළු ගෑස් ප්‍රහාර හේතුවෙන් අවම වශයෙන් පුද්ගලයින් පස් දෙනෙකු මියගොස් විශාල සංඛ්‍යාවක් තුවාල ලබා ඇති බව පොලිසිය පවසනවා.
සඳුදා ප්‍රධාන මහාමාර්ග සහ දුම්රිය මාර්ග අවහිර කරමින් පැවති විරෝධතා අතරතුර 100කට වැඩි පිරිසක් තුවාල ලැබීමෙන් පසු දස දහස් ගණනක් සිසුන් දෙවන දිනටත් රට පුරා විරෝධතාවලට සම්බන්ධ වුණා.
අගමැතිනි ෂීක් හසීනාගේ ආණ්ඩුවට එරෙහි ව ඇය ජනවාරි මාසයේ දී සිව්වැනි වරටත් අඛණ්ඩ ව ජයග්‍රහණය කිරීමෙන් පසු පැවැත්වෙන දැවැන්තම විරෝධතාව මෙයයි.
ඉහළ තරුණ විරැකියාව මධ්‍යයේ 1971 නිදහස් සටන්කාමීන්ගේ පවුල්වල සාමාජිකයින් සඳහා රාජ්‍ය අංශයේ රැකියාවලින් 30% ක කෝටාවක් වෙන් කිරීම ඇතුළු රාජ්‍ය අංශයේ රැකියා කෝටාව සම්බන්ධයෙන් විරෝධතාකරුවන් කෝපයට පත්ව සිටිනවා.
විරෝධතා මැඩපැවැත්වීමේ උත්සාහයක් ලෙස කැරලි මර්දන පොලිසිය රට පුරා විශ්වවිද්‍යාල පරිශ්‍ර තුළට ඇතුළු වී තිබෙනවා.
ස්ථාන කිහිපයක ගැටුම් අඛණ්ඩ ව පවතින බැවින් ආරක්ෂාව තර කිරීම සඳහා දේශසීමා ආරක්ෂක පැරාමිලිටරි බලකාය රට පුරා යෙදවීමට පියවර ගැනුණා.
