ප්‍රහසන රංගවේදී ෆ්‍රෙඩීගේ බිරිඳ දිවිසැරිය නිමකරයි

මෙරට සිටි අතිදක්ෂ ප්‍රහසන රංගන ශිල්පියෙකු වූ ෆ්‍රෙඩී සිල්වාගේ බිරිඳ වන රංගන ශිල්පිනී මානෙල් චන්ද්‍රලතා අභාවප්‍රාප්ත වී තිබෙනවා.

ඇය අද (16) උදෑසන අභාවප්‍රාප්ත වූ බවයි වාර්තා වන්නේ.

දිගු කලක් ඇය අසනීප තත්ත්වයෙන් පසු වූ අතර; පානදුර රෝහලේ ප්‍රතිකාර ලබමින් සිටියදී ඒ මහත්මිය අභාවප්‍රාප්ත වුණා.

වසර පහළොවක පමණ කාලයක සිට පිළිකා රෝගයෙන් පීඩා විඳි ඇය අද දිනයේ මහරගම පිළිකා රෝහලට ඇතුළත් කිරීමට සූදානමින් සිටි බව ද රෝහල් ආරංචි මාර්ග සඳහන් කළා.

මානෙල් චන්ද්‍රලතා අභාවප්‍රාප්ත වන විට 68 වන වියේ පසුවුණා.

ජය සිකුරු චිත්‍රපටියෙන් වර්ෂ 1984 දී සිනමාවට පිවිසෙන ඇය; චණ්ඩියාගෙත් චණ්ඩියා ,නැව ගිලුණත් බෑන් චූන්, නොම්මර 17, රන්දෙණිගල සිංහයා, යුක්තියට වැඩ, වලව්වේ හාමු ,ජය කොතනද, සේයා, ඩොක්ට නවරියන්, කොලොම්පූර්, ඔක්කොම හොඳටයි, ජීවන් මල්ලි, අලිබබා සහ හොරු හතළිහ, හෙලෝ මයි ඩාලින් වැනි චිත්‍රපට 58කට පමණ සිය රංගනයෙන් දායක වී ඇති දක්ෂතා සපිරි රංගන ශිල්පියක්.

2018 වසරේ ‘ පුංචි අන්දරේ’ චිත්‍රපටයට එක් වූයේ ඇය ඇයගේ අවසන් සිනමා පටය ලෙසටයි.

ඉන් අනතුරුව ඇය පිළිකා රෝගයෙන් පීඩා විඳීම හේතුවෙන් ඉන් ඉවත් වුණා.

ඇයගේ දේහය මේ වනවිට ගල්කිස්ස මහින්ද මල්ශාලාවේ තැන්පත් කර ඇති අතර අවසාන කටයුතු
අනිද්දා (18) ගල්කිස්ස සුසාන භූමියේ දී සිදු කිරීමට නියමිතයි.