අතුරුගිරියේ වෙඩි තැබීමකින් ඝාතනයට ලක් වූ ‘ක්ලබ් වසන්තගේ අභාවයට ශෝකය පළ කරමින් ඔහුගේ උපන්ගම හා දේශපාලන කටයුතු සිදු කළ නුවරඑළියේ ස්ථාන කිහිපයක අවමංගල සැරසිලිවලින් සරසා තිබෙනවා.
අප ප්‍රාදේශීය වාර්තාකරු පැවසුවේ නුවරඑළිය නගර මධ්‍යයේ සේ ම ඇතැම් නගරබද සාප්පුවල ද මෙම ශෝකී සටහන් පළ කර ඇති බවයි.
ඉකුත් 08 වැනි දින ටැටූ මධ්‍යස්ථානයක් විවෘත කිරීම සඳහා සහභාගී වූ අවස්ථාවේ දී සිදු වූ වෙඩි තැබීමකින් ඝාතනයට ලක් වූ සන්හිල් වසන්ත නැතහොත් කැරකෝ වසන්ත, ක්ලබ් වසන්ත යන අන්වර්ථ නාමයන්ගෙන් හැඳින්වූ මෙම කෝටිපති ව්‍යාපාරිකයාගේ අභාවය වෙනුවෙන් මෙම ශෝකී පණිවිඩ සහ සැරසිලි සිදු කර තිබෙනවා.
නුවරඑළිය ප්‍රදේශයේ ප්‍රභූවරුන්ට සහ ප්‍රසිද්ධ වෙළෙඳ ව්‍යාපාරිකයන්ගේ අවමංගල්‍ය උත්සව සඳහා පමණක් සැරසිලි සිදු කිරීමට නුවරඑළිය ප්‍රධාන වට රවුම්වල මෙලෙස අවමංගල්‍ය සැරසිලි සිදු කර තිබීම හා ශෝක පණිවිඩ ප්‍රදර්ශනය කිරීමට නුවරඑළිය මහ නගර සභාව අවසර ලබා දී තිබීම ද විශේෂත්වයක්.
ඝාතනයට ලක් වූ සුරේන්ද්‍ර වසන්ත පෙරේරා මහතා නුවරඑළියේ උපන් අයෙකු වන අතර ඔහු 1977 වසරේ නුවරඑළිය අප ස්වාමිඳුගේ ප්‍රාථමික පාසලේ අධ්‍යාපන ලබා ඇති අතර ඉන් අනතුරුව 1982 වසරේ සිට ද්විතීයික අධ්‍යාපනය නුවරඑළිය ගාමිණී ජාතික පාසලට ඇතුළත්ව 1988 වසරේ අධ්‍යයන පොදු සහතික පත්‍ර උසස් පෙළ විභාගය සඳහා ගණිත අංශයෙන් පෙනී සිට තිබෙනවා.
අපොස. උසස් පෙළ විභාගයෙන් ඉහළ ප්‍රතිඵල ලබාගත් සුරේන්ද්‍ර වසන්ත පෙරේරා මහතා උසස් පෙළ හදාරන කාල වකවානුව තුළ ම ඉතාම ප්‍රාථමික අයුරින් ආරම්භ කළ සිය ව්‍යාපාරය සන්හිල් හෝටලය පවත්වාගෙන යමින් 2002 වසරේ නුවරඑළිය මහ නගර සභාවට එක්සත් ජාතික පක්ෂයෙන් තරඟ වැදුණු අපේක්ෂකයෙකු ද වනවා.
මැතිවරණ පරාජයත් සමඟ නුවරඑළියේ ව්‍යාපාරයන් කළමනාකරුවන්ට පවරා කොළඹ ප්‍රදේශයේ ව්‍යාපාර සඳහා නුවරඑළියෙන් පිටත්ව ගොස් ඇති බවයි පැවසෙන්නේ.
නුවරඑළියේ මහජනතාව, ව්‍යාපාරිකයන් ඇතුළු සියලු පාර්ශ්වයන් ඔහුගේ ඝාතනය පිළිබඳ සිය ශෝකය පළ කිරීමට කොළඹට ද පැමිණීමට තීරණය කර තිබෙනවා.
ඔහුගේ දේහය මහජන ගෞරවය සදහා 12 – 13 දිනයන්හි කොළඹ බෞද්ධාලෝක මාවත පිහිටි පෞද්ගලික ප්‍රභූ මල් ශාලාවක තැන්පත් කර තබා ඇති අතර එය අනිද්දා (13) දින සවස බොරැල්ල පොදු සුසාන භූමියේ දී අවසාන කටයුතු සිදු කිරීමට නියමිතයි.
