මන්නාරම, මුරුන්කන් ප්‍රදේශයේ දී ඊයේ (21) සවස සිදු වු රිය අනතුරකින් එක් අයෙකු ජීවිතක්ෂයට පත් ව තවත් 14 දෙනෙකු තුවාල ලබා රෝහල්ගත කර තිබෙනවා.
අප ප්‍රාදේශීය වාර්තාකරු පැවසුවේ; මෙලෙස ජීවිතක්ෂයට පත් ව ඇත්තේ කල්මුනෙයි ප්‍රදේශයේ පදිංචි 72 හැවිරිදි කාන්තාවක් බවයි.
කල්මුනෙයි ප්‍රදේශයේ සිට මන්නාරම දක්වා වෑන් රථයකින් ගමන් කරමින් සිටි පිරිසක් මෙලෙස අනතුරට ලක් ව තිබෙනවා.
රිය අනතුරට ලක් වූ පිරිස එකම පවුලේ පිරිසක් බව ද හෙළි ව ඇති බවයි වාර්තා වන්නේ.
වෑන් රථයේ රියදුරුට නින්ද යාම හේතුවෙන් වෑන් රථය මාර්ගය අසළ විදුලි කණුවක ගැටීමෙන් අනතුර සිදු ව ඇති බවට පොලිසිය සැක කරනවා.
අනතුරින් තුවාල ලැබූවන් මුරුන්කන් රෝහලට ඇතුළත් කෙරුණා.
ඉන් පුද්ගලයින් 07 දෙනෙකු වැඩිදුර ප්‍රතිකාර වෙනුවෙන් මන්නාරම රෝහලට ඇතුළත් කර ඇති බව ද වාර්තා වනවා.
සිද්ධිය සම්බන්ධයෙන් මුරුන්කන් පොලිසිය වැඩිදුර පරීක්ෂණ මෙහෙයවනු ඇති.
