මතින් තොර රටක් බිහි කරන බව පවසමින් ආණ්ඩු විශාල සංඛ්‍යාවක් බිහි වුවත් ඔවුන් බලයට පත් වූ විගස බාර් පර්මිට් දුන් බවත් මේ නිසා පාසල් මට්ටමින් අමද්‍යප ව්‍යාපාරයක් අවශ්‍ය බවත් මත්පැන් මත්ද්‍රව්‍ය හා දුම්වැටි පාසල් ආක්‍රමණය කර ඇති බවත් මෙයට විරුද්ධව අම්මලා සහ තාත්තලා එකතු විය යුතු බවත් විපක්ෂ නායක සජිත් ප්‍රේමදාස පවසනවා.
විපක්ෂ නායකවරයා මේ බව සඳහන් කළේ අනුරාධපුර කලාවැව, තඹුත්තේගම සෝලම විද්‍යාලයට සක්වල සුහුරු පන්ති කාමර වැඩසටහනේ 188 වැනි අදියර යටතේ රුපියල් 1,177,000 වටිනා සුහුරු පන්ති කාමරයක් පරිත්‍යාග කිරීමේ අවස්ථාවට එක්වෙමිනි.
මේ වනවිට දේශපාලනඥයන් බිලී බා ගන්න මෘදු මත්පැන් බලපත්‍ර ලබා දෙන බවත් මේ ගැන හැමදාම පාර්ලිමේන්තුවේ කතා කරන බවත් මෙසේ ගන්නා සෑම මත්පැන් බලපත්‍රයක්ම සමගි ජන බලවේග රජයක් තුළ අහෝසි කරන බවත් මත්පැන් ප්‍රවර්ධනයට මත්ද්‍රව්‍යවලට දුම්වැටි ප්‍රවර්ධනයට ඉඩක් නොමැති බවත් මේ කතාව කියන්නේ ඡන්දයක් නොමැති 41 ලක්ෂයක් පාසල් දූ දරුවන්ගේ අභිවෘද්ධිය උදෙසා බවත් විපක්ෂ නායකවරයා එහිදී අවධාරණය කළා.
අප රටේ මුළු ණය බරතාව ඇමරිකානු ඩොලර් බිලියන 100ක් බවත් සුන්දර කියා කිසිවක් නොමැති බවත් මේ සුන්දර තත්ත්වය වසර 2-3කට පමණක් සීමා වන බවත් ජාත්‍යන්තර මූල්‍ය අරමුදල මේ කාල සීමාව තුළ ණය ගෙවීම අවශ්‍ය නොවන බවට පවසා ඇති බවත් වසර 2-3කින් ද්වීපාර්ශ්වීය, බහු පාර්ශ්වීය ණය, විදේශීය සෛරී බැඳුම්කර අයිතිකරුවන්ට මෙන්ම දේශීය ණය හිමියන්ට ද ණය ගෙවිය යුතු බවත් මේ තත්ත්වයෙන් ගොඩ එන්න නම් ආර්ථිකය ශීඝ්‍ර වර්ධනයක් ඇති කළ යුතු බවත් විපක්ෂ නායකවරයා පැවසීය.
මේ සඳහා සෑම ක්ෂේත්‍රයක්ම ශක්තිමත්ව ඉදිරියට යා යුතු බවත් සෘජු විදේශ ආයෝජන ශක්තිමත් කළ යුතු බවත් ඒ සඳහා පගාව, හොරකම තුරන් කළ යුතු බවත් සමගි ජන බලවේග රජයක් තුළ සියලුම රාජ්‍ය ගනුදෙනු විනිවිදභාවයෙන් යුක්තව කටයුතු කරන බවත් ලක්ෂ 220 ඇස් වසා ප්‍රසම්පාදන ක්‍රමවේදයෙන් බැහැරව වර්තමානයේ හොරා කන තත්ත්වයක් ඇති බවත් විපක්ෂ නායකවරයා සඳහන් කළේය.
බලයට ආවොත් අධ්‍යාපනය වෙනුවෙන් සෞඛ්‍ය වෙන් කරන රජයේ මුදල් වැඩි කරනවා යැයි හැමෝම කියන බවත් සමගි ජන බලවේගය හැර සෑම විකල්පයක්ම ක්‍රියාත්මක වන්නේ පැරණි සම්ප්‍රදායික රාමුව මත බවත් ඒ නිසා ඔවුන්ට සක්වල හුස්ම කිරීම හීනයක් බවත් සමගි ජන බලවේගයේ සිටින්නේ කයිවාරුවට පමණක් සීමා වූ දේශපාලනඥයන් නොව සේවාවන් කිරීමට බැදී සිටින දේශපාලනඥයන් බවත් එම නිසා සමගි ජන බලවේග රජයක් තුළ රාජ්‍ය මුදල්වලට අමතරව පෞද්ගලික දානපතියන්ගෙන් ද ආධාර උපකාර ලබා ගෙන රටේ සංවර්ධන කටයුතු සිදු කරන බවත් විපක්ෂ නායකවරයා පැවසීය.
රාජ්‍ය පාලනය විහිලුවක් නොවන බවත් නායකයා පරමාදර්ශී දැක්මක් ඇත්තෙක් විය යුතු බවත් අනුන්ට බණ දේශනා කරන්නට පෙර තමන් සුදුසු ගුණයේ පිහිටා සිටිය යුතු බවට ධම්ම පදයේ පවා සඳහන් බවත් ඒ ආකාරයෙන්ම සමගි ජන බලවේගය රට පාලනය කරනා බවත් විපක්ෂ නායකවරයා මෙහි දී අවධාරණය කළේය.
මෙරට අධ්‍යාපන පද්ධතිය තුළ විෂයන් කිහිපයක් හැරුණු කොට බහුතරයක් විෂයන් රැකියා වෙළෙඳපොළට උචිත නොවන නිසා විරැකියාව වැඩි වී ඇති බවත් මෙහි වෙනසක් සිදුවිය යුතු බවට තමා සිතන බවත් යම් හෙයකින් මෙවැනි වෙනසක් සිදු කිරීමට උත්සාහ කරන විට විජාතික බලවේග යැයි කියමින් උද්ඝෝෂණ කියමින් පාරට බහින කොට්ඨාසයක් සිටින බවත් මෙම සටන්පාඨවලට රැවටී පාරට බැස මෙම නූතනවාදි අධ්‍යාපනය හඳුන්වා දීම කඩාකප්පල් කිරීමෙන් පාඩු සිදුවන්නේ කාටද කියා ජනතාව බුද්ධිමත්ව සිතිය යුතු බවත් සටන් පාඨවලට නොරැවටි සත්‍යවාදී දත්ත කේන්ද්‍රීය විද්‍යාත්මකව අත්හදා බලපු සාර්ථක ක්‍රියාදාමවලට යොමුවිය යුතු බවත් විපක්ෂ නායක සජිත් ප්‍රේමදාස මෙහි දී පැවසීය.
