මාර්ගගත ක්‍රමවල සුරක්ෂිතභාවය පිළිබඳ පනත් කෙටුම්පත (සංශෝධනයන්ට යටත්ව) අද දිනයේ පාර්ලිමේන්තුවට ඉදිරිපත් කිරීමට නියමිතව තිබෙනවා.
ඒ, අනුව මේ සම්බන්ධයෙන්වන විවාදය අද (23) සහ හෙට (24) යන දෙදින තුළ පාර්ලිමේන්තුවේ දී පැවැත්වීමට නියමිතයි.
මෙම පනත් කෙටුම්පතට මාධ්‍ය, තාරුණ්‍ය, උරුමය හා නූතන පුරවැසියා පිළිබඳ ආංශීක අධීක්ෂණ කාරක සභාවේ අනුමතිය හිමිව තිබෙනවා.
ඒ, අදාළ එම කාරක සභාව පාර්ලිමේන්තු මනිත්‍රී ලලිත් වර්ණකුමාරගේ සභාපතිත්වයෙන් ඊයේ (22) පාර්ලිමේන්තුවේ දී රැස් වූ අවස්ථාවේදීයි.
මේ අතර පනත් කෙටුම්පත පිළිබඳ අධ්‍යයනය කොට සංශෝධන සිදුකිරීමට තවදුරටත් කාලය අවශ්‍ය බව විපක්ෂ මන්ත්‍රීවරුන්ගෙන් මෙහිදී කමිටුවට යෝජනාවක් ද ඉදිරිපත් වුණා.
මාර්ගගත ක්‍රමවල සුරක්ෂිත භාවය පිළිබඳ පනත් කෙටුම්පත පිළිබඳ විවාදය මෙම සතියේ දී පැවැත්වීමට පසුගිය සතියේ කථානායක මහින්ද යාපා අබේවර්ධනගේ ප්‍රධානත්වයෙන් රැස් වූ පාර්ලිමේන්තු කටයුතු පිළිබඳ කාරක සභාවේදී තීරණය කර කෙරුණා.
මෙම පනත් කෙටුම්පත ගැසට් පත්‍රයක් මඟින් ප්‍රකාශයට පත් කෙරුණේ පසුගිය වසරේ සැප්තැම්බර් 23 වනදායි.
මාර්ගගත ක්‍රමවල සුරක්ෂිතභාවය පිළිබඳ කොමිෂන් සභාව පිහිටුවීම, ශ්‍රී ලංකාව තුළ සිද්ධියක් පිළිබඳ ඇතැම් ප්‍රකාශ මාර්ගගත ලෙස සන්නිවේදනය කිරීම තහනම් කිරීම පිණිස විධිවිධාන සැලැසීම, තහනම් කාර්ය සඳහා මාර්ග ගත ගිණුම් සහ ව්‍යාජ මාර්ගගත ගිණුම් භාවිත කිරීම වැළැක්වීම, ශ්‍රී ලංකාව තුළ තහනම් කාර්ය සඳහා භාවිත කරනු ලබන මාර්ගගත ස්ථාන හඳුනාගැනීම සහ ප්‍රකාශයට පත්කිරීම සඳහා විධි විධාන සැලැස්වීම, සිද්ධියක් පිළිබඳ අසත්‍ය ප්‍රකාශ සන්නිවේදනය කිරීම සඳහා මුදල් සැපයීම සහ අනෙකුත් ආධාර ලබාදීම මැඬ පැවැත්වීම යන කරුණු වෙනුවෙන් මෙම පනත් කෙටුම්පත ගෙන ඒමට නියමිතයි.
