අසනීප වූ මව රැගෙන යමින් සිටි පුතා රෝහල ආසන්නයේ දී අනතුරකට ලක්වෙයි

අනුරාධපුර ජෝසප් මහා විද්‍යාලය දෙස සිට ඊයේ රාත්‍රියේ පැමිණි මෝටර් රථයක් මාර්ගයෙන් ඉවතට පැන රෝහල් වටරවුම මතට වැටී අනතුරට ලක් ව තිබෙනවා.

අප ප්‍රාදේශීය වාර්තාකරු පැවසුවේ; තම මවට ඇති වූ රෝගාබාධයක් හේතුවෙන් රථයේ රියදුරු සිය මව ව අනුරාධපුර ශික්ෂණ රෝහල වෙත රැගෙන එමින් සිටියදී මෙම අනතුර සිදු වී ඇති අතර අනතුරින් දෙදෙනාට ම සුළු තුවාල සිදු වී රෝහල්ගත කර ඇති බවයි.

මෝටර් රථයට සහ රෝහල් වටරවුමට දැඩි අලාභ හානි සිදු වී තිබෙනවා.

ප්‍රදේශවාසීන් පවසන්නේ සංචාරකයන් බහුල ව ගැවසෙන මෙන් ම රෝගීන් පැමිණෙන ප්‍රධාන ස්ථානයක් වන මෙම රෝහල් වටරවුම වටා ඇති වීදි ලාම්පු අක්‍රීය ව පැවතීම නිසා මෙම ස්ථානයේ අනතුරු කිහිපයක් සිදු වූ බවත් ඒ සඳහා මෙතෙක් නිසි විසඳුම් නොලැබී ඇති බවයි.

සිද්ධිය සම්බන්ධයෙන් අනුරාධපුර පොලිසියේ රථවාහන අංශය වැඩිදුර පරීක්ෂණ පවත්වනවා.