අපරාධ රැසක් සිදුකර මේ වනවිට ඩුබායි රාජ්‍යයේ සැඟවී සිටින කුප්‍රකට අපරාධ කල්ලි සාමාජික ‘මන්නා රමේෂ්’ නැමැත්තා අත්අඩංගුවට ගැනීමට ජාත්‍යන්තර පොලීසිය හරහා රතු වරෙත්තු ලබාගැනීමට පොලීසිය කටයුතු කර තිබෙනවා.
මොහු ඩුබායි රාජ්‍යයේ සැඟවී සිටිමින් මේ වනවිටත් මෙරට අපරාධ මෙහෙයවන බවයි අනාවරණය වී ඇත්තේ.
ඒ, අනුව ඔහු මේ වනවිට සිදුකර ඇති මිනිස් ඝාතන, කප්පම්ගැනීම්, මත්ද්‍රව්‍ය ජාවාරම් ඇතුළු අපරාධ ගණනාවකට අදාළ තොරතුරු අපරාධ පරීක්‍ෂණ දෙපාර්තමේන්තුව හරහා ජාත්‍යන්තර පොලීසිය වෙත දැනුම්දීමට කටයුතු කර තිබෙනවා.
අවිස්සාවේල්ල, රත්නපුර ඇතුළු ප්‍රදේශවල මැණික් ව්‍යාපාරිකයන්ට මරණීය තර්ජන එල්ලකරමින් මන්නා රමේෂ් ඔවුන්ගෙන් විශාල වශයෙන් කප්පම් ලබාගැනීම සිදුකරන බවයි පොලීසිය පවසන්නේ.
මේ අතර පසුගිය දා අවිස්සාවේල්ල – තල්දුව ප්‍රදේශයේ දී ත්‍රිරෝද රථයක යමින් සිටි හතරදෙනෙක්‌ට වෙඩි තබා ඉන් දෙදෙනෙකු ඝාතනය කිරීමේ සිද්ධිය මන්නා රමේෂ් විසින් මෙහෙයවා ඇති බවයි අනාවරණය වුණේ.
එම සිද්ධියෙන් පසුව මෙම කුප්‍රකට අපරාධ කල්ලි සාමාජිකයා ගැන සමාජයේ කතාබහක් මතුව ආවා.
මෙම ද්විත්ව ඝාතනයෙන් පසු එම අපරාධය සිදුකළ මන්නා රමේෂ්ගේ කල්ලියේ ප්‍රධානම ගෝලයා වූ තල්දුවේ මහේෂ් නමැත්තා අත්අඩංගුවට ගෙන සිටිය දී පොලිස් වෙඩි පහරින් ජීවිතක්ෂයට පත් වුණා.
ඊට කෝපයට පත් මන්නා රමේෂ් අවිස්සාවේල්ල මූලස්ථාන ප්‍රධාන පොලිස් පරීක්ෂකවරයාට දුරකථන ඇමතුමක් මඟින් මරණිය තර්ජන සිදුකර ඇති බවට අනාවරණය වී තිබෙනවා.
