නිවසක මෙහෙකරු විසින් ගෙහිමි කාන්තාව ඝාතනය කිරීමේ සිද්ධිය සම්බන්ධයෙන් ඊට අදාළ සැකකරු ව අත්අඩංගුවට ගැනීමට බේරුවල පොලිසියට හැකි වී තිබෙනවා.
මෙම ඝාතකයා ව පොලිසිය විසින් අත්අඩංගුවට ගනු ලැබුවේ ඊයේ මිරිහාන ප්රදේශයේදියි.
සැකකරු බේරුවල – ගාලු පාරේ හෙට්ටිමුල්ල – වද කහවෙල ප්රදේශයේ නිවසක හිමිකාරිනියව පසුගිය 07 වැනිදින නයිලෝන් වර්ගයේ කඹයකින් ගෙල සිරකොට ඝාතනය කර පලා ගියා.
මෙම සැකකරු විසින් මල් පෝච්චියකින් ද මරණකාරිනියගේ හිසට පහර දී ඇති බවයි පශ්චාත් මරණ පරීක්ෂණයේ දී හෙළි වුණේ.
මෙලෙස මියගියේ එම නිවසේ පදිංචි ව සිටි 58 හැවිරිදි විවාහක කාන්තාවක්.
හිමිකාරිනිය සහ මෙහෙකරු අතර ඇති වූ බහින් බස් වීමක් දුරදිග යාමෙනුයි මෙම ඝාතනය සිදු ව ඇත්තේ.
සැකකරු පලා යාමේ දී නිවසේ තිබූ රුපියල් 100,000කට ආසන්න මුදලක් ද රැගෙන පලා ගොස් තිබෙනවා.
කෙසේවෙතත් අදාළ සිදුවීම සම්බන්ධයෙන් පොලිසිය වෙත සැකකරු පාපොච්චාරණයක් ද සිදු කර ඇති බවයි වාර්තා වන්නේ.
මෙම සැකකරු අද දිනයේ දී කළුතර මහේස්ත්රාත් අධිකරණයට ඉදිරිපත් කෙරුණු අතර, වැඩිදුර විමර්ශන සඳහා ඔහු ව රක්ෂිත බන්ධනාගාරගත කර තිබෙනවා.
