අද සිට දිල්ලියට රුපියල් 25ට ලොකු ලූනු

අද (21) දිනයේ සිට නව දිල්ලියේ පාරිභෝගික ජනතාවට ලොකු ලූනු කිලෝග්‍රෑමයක් රුපියල් 25.00ක සහනාධාර මිලකට අලෙවි කිරීමට ඉන්දීය රජය තීරණය කර තිබෙනවා.

ඒ, අනුව ජංගම වෑන් රථ සහ සිල්ලර අලෙවිසැල් හරහා අද දිනයේ සිට මෙම සහනදායී මිලට ලොකු ලූනු අලෙවි කිරීම අරඹන බවයි ඉන්දියානු ජාතික සමුපකාර පාරිභෝගික සම්මේලනය සඳහන් කළේ.

නව දිල්ලියෙන් අරඹන මෙම සහනාධාර මිලකට ලූනු අලෙවි කිරීමේ ව්‍යාපෘතිය තවත් ප්‍රාන්ත හතරක ඉදිරි දින දෙක තුළ ආරම්භ වන බව එම සම්මේලනය වැඩිදුරටත් පැවසුවා.

නිල දත්තවලට අනුව ඊයේ (20) දිනය වන විට ඉන්දියාව තුළ ලූනු කිලෝග්‍රෑමයක මිල රුපියල් 29.73ක් ලෙස වාර්තා වී තිබෙනවා.

මේ අතර ඉන්දීය රජය විසින් ලොකු ලූනු කිලෝග්‍රෑමයක් සඳහා 40%ක අපනයන බද්දක් පැනවීමට පසුගිය දා තීරණය කළා.

වෙළඳපොළ තුළ ලොකු ලූනු මිල ඉහළ යාමත් සමඟ මෙම තීරණය ගත් බවයි ඉන්දීය රජය පැවසුවේ.

මේ අතර 2023-24 මූල්‍ය වර්ෂය සඳහා රජය, ලූනු ටොන් ලක්ෂ 03ක ආරක්ෂිත තොගයක් නිර්මාණය කර ඇති අතර, මෙම වසරේ රක්ෂිත තොගය සඳහා අමතර ලූනු ටොන් ලක්ෂ 02ක් මිලදී ගැනීමට ද තීරණය කර ඇති බවයි වාර්තා වන්නේ.