පසුගිය (27) වනදා තලවතුගොඩ ප්‍රදේශයෙන් අතුරුදන් වූ බව කියන මෝටර් රථයක් සොරකම් කිරීම සඳහා වාහන ස්වයංක්‍රීයව ක්‍රියාත්මක කිරීමට භාවිත කරන නවීන මෝටර් රථ ඩිජිටල් ස්කෑනර් යන්ත්‍රයක් යොදාගෙන ඇති බව පොලිස් පරීක්ෂණවලදී අනාවරණය වී තිබෙනවා.
අතුරුගිරියේ බැංකු නිලධාරියකුගේ රුපියල් කෝටියකට ආසන්න වටිනාකමකින් යුත් මෝටර් රථයක් තලවතුගොඩ ප්‍රදේශයේ වෛද්‍ය මධ්‍යස්ථානයක රථ ගාලකින් සොරාගෙන ගොස් ඇති බවටයි වාර්තා වුයේ.
කොල්ලකෑම සම්බන්ධයෙන් විමර්ශන ආරම්භ කළ තලංගම පොලිසිය සිද්ධියෙන් පැය 24ක් ඇතුළත සැකකරුවන් දෙදෙනෙකු අත්අඩංගුවට ගෙන මෝටර් රථය ද සොයා ගෙන තිබෙනවා.
කඩුවෙල ප්‍රදේශයෙන් අත්අඩංගුවට ගත් එක් සැකකරුවෙකු සතුව තිබී ස්වයංක්‍රීයව මෝටර් රථයක් පණ ගැන්විය හැකි නවීන තාක්ෂණයෙන් යුත් යන්ත්‍රයක් සොයා ගැනුණා.
සැකකරු විසින් මෙම යන්ත්‍රය අන්තර්ජාලයේ ප්‍රචාරයක් මගින් රුපියල් 60,000 කට මිලදී ගෙන ඇති බවටයි පොලිස් පරීක්ෂණවලදී අනාවරණය වී ඇත්තේ.
මේ අතර දෙවන සැකකරු සතුව විවිධ වර්ගයේ සිම් කාඩ්පත් 2000කට අධික ප්‍රමාණයක් තිබී සොයා ගෙන ඇතැයි සඳහන්.
සැකකරුවන් අධිකරණයට ඉදිරිපත් කිරීමට නියමිතයි.
