නවගමුව, නාගහවත්ත පාර රනාල ප්‍රදේශයේ නිවසක් තුළ මත් සාදයක් පවත්වන බවට ලද තොරතුරක් මත පොලිසිය ඊයේ (03) එහි වැටලීමක් සිදුකර තිබෙනවා.
එහිදී කාන්තාවන් සිව්දෙනෙකු සමඟ පිරිමි පුද්ගලයින් 07 දෙනෙකු අත්අඩංගුවට ගත් බවයි නවගමුව පොලිසිය පවසන්නේ.
අත්අඩංගුවට ගත් පිරිස සන්තකයේ තිබී අයිස් මත්ද්‍රව්‍ය ග්‍රෑම් 06 මිලිග්‍රෑම් 850ක් පොලිසිය විසින් සොයා ගැනීමට හැකිව තිබෙනවා.
මෙලෙස අත්අඩංගුවට ගැනුණු සැකකාරියන් වයස අවුරුදු 28ත් 48ත් අතර වයස්වල පසුවන තැනැත්තියන් බවයි වාර්තා වන්නේ.
ඔවුන් අතුරුගිරිය, වත්තතල, වැල්ලම්පිටිය සහ කොළඹ 12 යන ප්‍රදේශවල පදිංචිකාරියන්.
සැකකරුවන් අවුරුදු 25ත් 44ත් අතර වයස්වල පසුවන්නන් වන අතර, ඔවුන් රනාල, බියගම, මරදාන, හෝකන්දර, අතුරුගිරිය, වත්තතල සහ කඩුවෙල යන ප්‍රදේශවල පදිංචිකරුවන් බවයි පොලිසිය වැඩිදුරටත් සඳහන් කළේ.
අත්අඩංගුවට ගත් පිරිස අද (04) කඩුවෙල මහේස්ත්‍රාත් අධිකරණය හමුවට ඉදිරිපත් කිරීමට නියමිතයි.
