ඉන්දියාවේ නැගෙනහිර කොල්කටා නගරයේ පැවති හින්දු ආගමික උත්සවයක් අතරතුර ඇති වූ තෙරපීමකින් පුද්ගලයින් 19 දෙනෙකු ජීවිතක්ෂයට පත්ව තිබෙනවා.
මියගිය පිරිස අතර කාන්තාවන් දහතුන් දෙනෙකු සහ දරුවෙක් ද සිටින බවයි ඉන්දීය මාධ්‍ය වාර්තා කරන්නේ.
බටහිර බෙංගාල ප්‍රාන්ත බලධාරීන් සඳහන් කළේ, මෙම අනතුරින් අවම වශයෙන් පුද්ගලයින් 25 දෙනෙකු පමණ තුවාල ලබා රෝහල් ගතකර ඇති බවයි.
තුවාල ලැබූවන්ගෙන් අට දෙනෙකුගේ තත්ත්වය බරපතල බව වාර්තා වනවා.
ඊයේ (17) පස්වරු 7:40ට පමණ, ගිරීෂ් පාර්ක් පොලිස් ස්ථාන බල ප්‍රදේශයේ පිහිටි සාරදා පාර්ක් (චෝර් බගාන්) පූජා මණ්ඩපයේ පිටවීමේ දොරටුව අසල, වර්ෂාව මධ්‍යයේ එහි පැමිණි විශාල ජනකායක් හේතුවෙන් තෙරපීම සිදුව ඇති බවයි වාර්තා වන්නේ.
‘චෝර්බගාන් දුර්ගා පූජා’ නැමැති ආගමික උත්සවය සංවිධානය කළ සංවිධායකයින් ද ඇතුළුව පුද්ගලයින් 12 දෙනෙකු පොලිසිය විසින් රඳවාගෙන ප්‍රශ්න කරමින් සිටින බවයි ඉන්දීය මාධ්‍ය වැඩිදුරටත් තොරතුරු වාර්තා කරන්නේ.
දින 10ක් පුරා පැවැත්වෙන දුර්ගා පූජා උත්සවයේ හත්වන දිනය වන ‘සප්තමි’ දිනයේදීයි මෙම ඛේදවාචකය සිදුව ඇත්තේ.
මේ අතර අග්‍රාමාත්‍ය නරේන්ද්‍රමෝදි මෙම සිදුවීම අතිශය කණගාටුදායක සිදුවීමක් ලෙස හඳුන්වා දී ඇති අතර, මියගිය අයගේ පවුල් සඳහා රුපියල් ලක්ෂ 02ක අතුරු වන්දි මුදලක් ලබා දෙන බව නිවේදනය කර තිබෙනවා.
