තුර්කිය සහ සිරියාවේ භූ කම්පනයෙන් පුරා මියගිය සංඛ්‍යාව 15,000 ඉක්මවා තිබෙනවා.
ද්විත්ව භූමිකම්පාවෙන් පසුව තුර්කියේ පුද්ගලයන් 12,391ක් මිය ගොස් ඇති බවටයි බලධාරීන් තහවුරු කර ඇත්තේ.
සිරියානු රජයේ නිලධාරීන් සහ වයඹ දිග සිරියාවේ කැරලිකරුවන්ගේ ගලවා ගැනීමේ කණ්ඩායමකට අනුව, එහි මියගිය සංඛ්‍යාව 2,992 දක්වා ඉහළ ගොස් ඇති තිබෙනවා.
ඒ අනුව මේ වන විට වාර්තා වී ඇති සමස්ත මරණ සංඛ්‍යාව 15,383 දක්වා ඉහළ ගොස් තිබෙනවා.
සහන කණ්ඩායම් අනාවැකි පළ කර ඇත්තේ දෙරටේම මරණ සංඛ්‍යාව තවත් ඉහළ යනු ඇති බවයි.
මේ අතර තුර්කියේ සිදුවූ දැවැන්ත භූමිකම්පාවෙන් විපතට පත්වූවන් බේරාගැනීමේදී හා සහන සැලසීමේදී රජය අතින් යම් යම් ගැටලු සිදුවූ බව එරට ජනාධිපති රිසෙප් තායිප් අඩර්ගෝඩ්න් පවසනවා.
ඒ, විපක්ෂය ඇතුලු විවේචකයින් එල්ලකරන දැඩි විවේචනවලට ප්‍රතිචාර දක්වමින්.
එහෙත් ජනාධිපතිවරයා පවසන්නේ තත්ත්වය මේ වන විට සම්පූර්ණයෙන් පාලනය කර ඇති බවයි.
හදිසි සේවාවල ප්‍රතිචාරය ඉතා මන්දගාමී බවත්, රජයේ සූදානම දුර්වල බවත් විවේචකයින් දිගින දිගටම චෝදනා කරනවා. මෙම ව්‍යවසනයට ජනාධිපතිවරයා වගකිව යුතු බවත් එරට විපක්ෂයේ අදහසයි.
එහෙත් එරට ජනාධිපතිවරයා පෙන්වා දෙන්නේ මෙවන් ව්‍යවසනකාරී කාල පරිච්චේදයකදී අවශ්‍ය වන්නේ එක්සත් භාවය බවයි. දේශපාලන අවශ්‍යතා වෙනුවෙන් මඩ ගැසීම් නොකළ යුතු බවයි ඔහු පවසන්නේ.
විපතට පත්වූවන්ට ආධාර සඳහා අමෙරිකානු ඩොලර් මිලියන 3.1 ක් ලබාදීමටයි යුරෝපා සංගමය මේ වන විට තීරණය කර ඇත්තේ. භූමිකම්පාවෙන් පසු රටවල් දෙකේම සහන සේවා කටයුතු තවදුරටත් ක්‍රියාත්මකයි.
