මෙම අවස්ථාවේ සිදු කළ යුතුව ඇත්තේ ජාතිවාදී අරගල කිරීම නොව ජාතික සමඟිය ඇති කිරීමට කටයුතු කිරීම බව හිටපු කථානායක කරු ජයසූරිය මහතා පවසනවා.
වසර 75ක් තුළ සිදුව ඇති අඩු පාඩු සකස් කර ගනිමින් ඊළඟ පරපුරට අභිමානවත් රටක් බාර දීමට එක් වන ලෙසටයි ඒ මහතා පක්ෂ විපක්ෂ සියලු දෙනා ගෙන් ඉල්ලා සිටියේ.
කරු ජයසූරිය මහතා “ශ්රී ලංකාභිමාන්ය”ගෞරව සම්මානයෙන් පිදුම් ලැබීමේ උත්සවයට එක්වෙමිනුයි මේ බව කියාසිටියේ.
එම උත්සවය ජනාධිපති රනිල් වික්රමසිංහ මහතාගේ ප්රධානත්වයෙන් අද (03) පෙරවරුවේ කොටුව ජනාධිපති මන්දිරයේ දී පැවැත් වුණා.
තම දේශපාලන ජීවිතය තුළ කිසිදු අවස්ථාවක කිසිවෙකුට පරිභව හෝ විවේචනය නොකළ බව සිහිපත් කළ කරු ජයසුරිය මහතා කිසිදු නීති විරෝධී කටයුත්තක් නොකළ බවයි මෙහිදී ප්රකාශ කළේ.
නව දේශපාලන සංස්කෘතියක් ඇති කිරීමට ගත් උත්සාහයක ප්රතිඵලයක් ලෙස මාදුළුවාවේ සෝභිත හිමි යෝජනා කළ යුක්තිය හා සාධාරණත්වය වෙනුවෙන් තම දේශපාලන දිවිය කැප කළ බවත් මෙම ශ්රී ලංකාභිමාන්ය ජාතික සම්මානය තමන් අනුගමනය කළ ප්රතිපත්තිවලට ලබා දුන් ගෞරවයක් බවත් ඔහු සඳහන් කළා.
තමන් දේශපාලනයට අවතීර්ණ වූයේ වත්මන් ජනාධිපති රනිල් වික්රමසිංහ මහතා එක්සත් ජාතික පක්ෂයේ නායකත්වයට පත් වූ පසු කරන ලද ආරාධනයට අනුව බව සිහිපත් කළ කරු ජයසූරිය මහතා එහිදී මහජනතාව සමඟ සමීපව කටයුතු කිරීමට ලැබීම පිළිබඳව සතුටට පත් වන බවද ප්රකාශ කළා.
නගරාධිපති ලෙස කොළඹ නගරසභාව තුළ නව සංස්කෘතියක් ඇති කිරීමට හැකි වූ බවත් එහි සාර්ථකත්වය අන්තර්ජාතිකව පවා පිළිගත් බවත් කරු ජයසූරිය මහතා සඳහන් කර තිබෙනවා.
කරු ජයසූරිය මහතා ජාතිය උදෙසා කරන ලද උත්කෘෂ්ඨ සේවය අගයමින් ඒ මහතා වෙත මෙම සම්මානය පිළිගැන් වුණා.
කරු ජයසූරිය මහතා වෙත පදක්කම් පළඳවා සම්මානය පිළිගැන්වීම ජනාධිපති රනිල් වික්රමසිංහ මහතා අතින් සිදු වූ අතර
එහිදී “කරු ජයසූරිය අභිමානනීය ජීවිත ගමනේ ප්රභාෂ්වර ප්රත්යාවලෝකනය” නම් සමරු ග්රන්ථය කරු ජයසූරිය මහතා විසින් ජනාධිපතිවරයා වෙත පිළිගන්වනු ලැබුවා.
75 වන ජාතික නිදහස් සැමරුම නිමිත්තෙනුයි මෙම වැඩසටහන සංවිධානය කර තිබුණේ.
ජීවිත කාලය තුළ එක්වරක් පමණක් හිමි වන “ශ්රී ලංකාභිමාන්ය”ගෞරව සම්මානය ශ්රී ලංකා රජය විසින් ශ්රී ලාංකික පුරවැසියෙකුට හා ශ්රී ලාංකික නොවන පුද්ගලයෙකුට ලබා දෙන ඉහළම ජාතික සම්මානයයි.
මෙම ගෞරවාභිධානය සමකාලීනව දැරිය හැක්කේ ශ්රී ලාංකිකයන් පස් දෙනෙකුට පමණක් වන අතර එනම් එම සම්මානය ලබා සිටින පස් දෙනෙකු ජීවතුන් අතර සිටී නම් එම සම්මානය සයවෙන්නෙකුට ලබාදීමට හැකියාවක් නැහැ.
ඉහත සීමාව ඉක්මවා නොයන පරිදි පුද්ගලයෙකුගේ මරණයෙන් පසුව ද මෙම සම්මානය පිරිනැමීමට හැකියාව පවතිනවා.
අවසන් වරට 2017 වසරේ දී ශ්රී ලාංකේය සංගීත කලාව වෙනුවෙන් සිදුකරන ලද අනභිබවනීය මෙහෙවර උදෙසා ඩබ්.ඩී. අමරදේව ශූරීන් ශ්රී ලංකාභිමාන්ය සම්මානයෙන් පිදුම් ලැබූ අතර හිටපු ජනාධිපතිවරුන් වන රණසිංහ ප්රේමදාස, ඩී.බී. විජේතුංග යන මහත්වරුන් ද, ආතර් සී. ක්ලාක්, ලක්ෂ්මන් කදිරගාමර්, ඒ.ටී. ආරියරත්න, ලෙස්ටර් ජේම්ස් පීරිස්, ක්රිස්ටෝපර් වීරමන්ත්රි යන මහත්වරුන් ද “ශ්රී ලංකාභිමාන්ය” සම්මානයෙන් පිදුම් ලබා තිබෙනවා.
