රජයට බදු ආදායම අහිමි කරමින් ජාතික ආරක්ෂාවට තර්ජනයක් වන අයුරින් පුද්ගලයන් යොදා ගනිමින් ජංගම දුරකථන මෙරටට රැගෙන ඒමේ සංවිධානාත්මක ජාවාරම සම්බන්ධයෙන් අමාත්‍ය මනූෂ නානායක්කාර මුදල් රාජ්‍ය අමාත්‍ය රංජිත් සියඹලාපිටිය සහ විදුලි සංදේශ නියාමන කොමිෂන් සභාව දැනුවත් කර තිබෙනවා.
එම ජාවාරම නතර කිරීමට අවශ්‍ය පියවර ගන්නා ලෙසටයි අමාත්‍යවරයා ඉල්ලා ඇත්තේ.
ජංගම දුරකථන ආනයනකරුවන්ගේ සංගමය අමාත්‍ය මනූෂ නානායක්කාර දැනුවත් කිරීමෙන් අනතුරුව ඔහු අදාළ කරුණු අදාළ අංශවලට පැහැදිලි කර තිබෙනවා.
රජයට අය විය යුතු බදු ආදායම අහිමි කරමින් පාර්සල් අදින්නන් හරහා (Hand Carriers) සංවිධානාත්මක ලෙස, ලියාපදිංචියකින් තොරව, ජංගම දුරකතන මෙරටට ගෙන්වීම සම්බන්ධයෙන්, ජංගම දුරකතන ආනයනකරුවන්ගේ එකමුතුව අමාත්‍යවරයාට කරුණු පැහැදිළි කළා.
එම තත්ත්වය අදාළ තොරතුරු මුදල් රාජ්‍ය අමාත්‍ය රංජිත් සියඹලාපිටිය මහතා වෙතත් විදුලි සංදේශ නියාමන කොමිසන් සභාව වෙතත් යොමු කර ඉදිරි පියවර ගැනීමට කටයුතු කරනු ලැබු බවයි අමාත්‍ය මනුෂ නානායක්කාර කියාසිටියේ.
2021 සහ 2022 වසරවල දී මේ ආකාරයට ජංගම දුරකතන ආනයනය කිරීම හේතුවෙන් ඇමරිකානු ඩොලර් මිලියන 100ක මුදලක් නීති විරෝධී ලෙස උණ්ඩියල් ක්‍රමය හරහා රටින් පිටව ගොස් ඇති බවට ජංගම දුරකතන ආනයනකරුවන්ගේ එකමුතුව තක්සේරු කර තිබෙනවා.
එමගින් රජයට අහිමිවී ඇති බදු ආදායම රුපියල් බිලියන 3.5ක් පමණ වන බවටයි තක්සේරු කර ඇත්තේ.
මේ ආකාරයට ලියාපදිංචියකින් තොරව ජංගම දුරකතන ආයනයනය කිරීම ජාතික ආරක්ෂාවට බලපාන අතර මෙම ජංගම දුරකථන සම්බන්ධයෙන් කිසිදු තොරතුරක් විදුලි සංදේශ නියාමන කොමිෂන් සභාවට ලබාගැනීමට හැකියාවක් නොමැති බව ද ආනයනයකරුවන් පෙන්වා දෙනු ලැබුවා.
ඒ අනුව රටේ බදු ආදායමටත්, ජාතික ආරක්ෂාවටත් බලපාන, නීති විරෝධී ආකාරයට ජංගම දුරකතන ආනයනය කිරීම් නතර කිරීමට අවශ්‍ය පියවර ගන්නා ලෙසට ඉදිරිපත්වූ ඉල්ලීම සම්බන්ධයෙන් අවධානය යොමු කරමින්, මුදල් රාජ්‍ය අමාත්‍යවරයාත්, විදුලි සංදේශ නියාමන කොමිෂන් සභාවත් සම්බන්ධ කරගනිමින් ඉදිරි පියවර ගැනීමට කටයුතු කළ බවයි අමාත්‍යවරයා කියාසිටියේ.
