ශ්‍රී ලංකාවේ සෞදි අරාබි තානාපති කලිඩ් හමඩ් නසාර් අල්දසම් අල්කතානි (Khalid Hamoud Nasser Aldasam Alkahtani) මහතා කථානායක ගරු මහින්ද යාපා අබේවර්ධන මහතා පසුගියදා (29) පාර්ලිමේන්තුවේදී හමුවුණා.
සෞදි අරාබියේ වැඩිම වැටුප් ලබන විදෙස් ශ්‍රමිකයන් අතර ලාංකිකයන් බහුතරයක් සිටින බව තානාපතිවරයා මෙහිදී පැවසීය. තානාපතිවරයා වැඩිදුරටත් සඳහන් කළේ සෞදි අරාබිය තුළ පුහුණු ශ්‍රමිකයන්ට අවස්ථා රැසක් පවතින බැවින් ශ්‍රී ලාංකික ශ්‍රමිකයන් පුහුණු කිරීම සඳහා වෘත්තීය පුහුණු මධ්‍යස්ථානයක් ස්ථාපිත කිරීමට කම්කරු අමාත්‍ය මනූෂ නානායක්කාර මහතාට යෝජනා කළ බවයි.
ශ්‍රී ලංකාව සහ සෞදි අරාබිය අතර ඉදිරි ආයෝජන සහ රැකියා අවස්ථා පිළිබඳවද මෙහිදී සාකච්ඡා විය. සෞදි අරාබිය ශ්‍රී ලංකාවට ලබාදෙන නිරන්තර සහය අගය කළ කථානායකවරයා, එම මිත්‍රත්වය තවදුරටත් වැඩිදියුණු කරගැනීමට අපේක්ෂා කරන බවද පැවසීය.
පාර්ලිමේන්තුවේ මහලේකම් ධම්මික දසනායක මහතා ද මෙම අවස්ථාවට එක්ව සිටියා.
