ශ්‍රී ලංකාවේ දැනට ක්‍රියාත්මක ජාත්‍යන්තර මූල්‍ය අරමුදලේ ආධාර වැඩසටහනේ ප්‍රගතිය සහ විනිවිදභාවය නොවැම්බර් මාසයේ දී ඉහළ ගොස් ඇති බව වෙරිටේ රිසර්ච් ආයතනය පවසනවා.
නොවැම්බර් මාසයේ තොරතුරුවලට අනුව 2024 අයවැය යටතේ ආධාරක වාර්තා කිහිපයක් ප්‍රසිද්ධ කිරීමත් සමඟ ශ්‍රී ලංකාවේ ක්‍රියාත්මක ආධාර වැඩසටහනේ ප්‍රගතිය සහ විනිවිදභාවය මෙලෙස ඉහළ ගොස් ඇති බවයි එම ආයතන සඳහන් කළේ.
IMF මීටරයේ මෙතෙක් ‘නොදනී’ ලෙස වර්ග කර තිබූ කැපවීම් හයක් පිළිබඳ තොරතුරු එම වාර්තාවලින් ලැබුණු බවත්, ඉන් කැපවීම් පහක් ශ්‍රී ලංකාව ඉටු කර ඇති බවත් එම ආයතනය නිවේදනයක් නිකුත් කරමින් සඳහන් කරනවා.
කෙසේ වෙතත් ආධාර වැඩසටහනේ එක් කැපවීමක් වන බදු ආදායම් ඉලක්කය සපුරා ගැනීම තවමත් ශ්‍රී ලංකාව ඉටුකර නොමැති බව ද එහි සඳහන්.
නොවැම්බර් මස අවසන් වන විට ඉටු කළ යුතු කැපවීම් 73න් 12ක් ඉටු කර නොමැති ලෙසත්, 15ක් නොදනී ලෙසත්, 46ක් ඉටුකර ඇති ලෙසත්, IMF මීටරයෙන් වර්ග කර තිබෙන බව එම ආයතනය සඳහන් කරනවා.
සමස්තයක් ලෙස ජාත්‍යන්තර මූල්‍ය අරමුදලේ ආධාර වැඩසටහන යටතේ නොවැම්බර් මස අවසාන වන විට ඉටු කළ යුතු කැපවීම්වලින් 63%ක් ශ්‍රී ලංකාව ඉටුකර අවසන් බව ද වෙරිටේ රිසර්ච් ආයතනය පවසනවා.
