පළාත් පාලන ආයතන ඡන්ද විමසීම (2023) වර්ෂයට අදාළ ක්‍රියාවලියේ ඇප තැන්පත් ආපසු ගෙවීම සම්බන්ධයෙන් වන විශේෂ නිවේදනයක් මැතිවරණ කොමිෂන් සභාව විසින් නිකුත් කරනු ලැබුවා.
අද (19) දිනයට ප්‍රකාරව මෙම නිවේදනය නිකුත් කරමින් මැතිවරණ කොමිෂන් සභාව සඳහන් කරන්නේ 2023 වර්ෂයේ දී පැවැත්වීමට නියමිතව තිබී කල් තබන ලද (262 වැනි අධිකාරය වූ) පළාත් පාලන ආයතන ඡන්ද විමසීමේ දී එකී ආඥා පනතේ 29 වැනි වගන්තිය යටතේ පිළිගත් දේශපාලන පක්ෂ හා ස්වාධීන කණ්ඩායම් විසින් තැන්පත් කරන ලද තැන්පතු පෙබරවාරි මස 17 වැනි දින පාර්ලිමේන්තුවේ සම්මත වූ 2025 අංක 1 දරන පළාත් පාලන ආයතන ඡන්ද විමසීම් (විශේෂ විධිවිධාන) පනතේ 2 (3) වගන්තිය අනුව එම තැන්පත් සිදු කරනු ලැබූ තැනැත්තා වෙත නිකුත් කරන ලද ලදුපත, එම තැනැත්තා විසින් ඉදිරිපත් කරනු ලැබූ විට එම තැනැත්තා වෙත ආපසු ගෙවිය යුතු යැයි දක්වා තිබෙන බවයි.
ඒ අනුව තැන්පත් කරන ලද ඇප මුදල් ආපසු ගෙවීමට එකී ආඥා පනතේ 29 (3) වන උප වගන්තිය යටතේ ඇප තැන්පත් මුදල් භාරගන්නා අවස්ථාවේ දී ඇප මුදල් තැන්පත් කරන ලද තැනැත්තා වෙත ලබාදෙන ලද ලදුපතෙහි මුල් පිටපත හා ඇප තැන්පත් මුදල් ආපසු ඉල්ලීමේ ලිපියක් සමගින් ඇප මුදල් ගෙවූ අදාළ දිස්ත්‍රික් මැතිවරණ කාර්‍යාලය වෙත එළඹෙන 28 වැනි දිනට පෙර භාර දෙන ලෙස මැතිවරණ කොමිෂන් සභාව දන්වා සිටිනවා.
එළඹෙන පෙබරවාරි 28 වැනි දිනට පෙර භාරදෙනු ලබන ඉල්ලීම් සඳහා අදාළ දිස්ත්‍රික් මැතිවරණ කාර්‍යාල මගින් අදාළ තැනැත්තන් වෙත ඇප තැන්පත් මුදල් ආපසු ගෙවීමට නොපමාව කටයුතු කරනු ඇති බවයි එම නිවේදනයේ වැඩිදුරටත් දැක්වෙන්නේ.
