රුපියල් දෙකෝටි පනස් ලක්ෂයක් පමණ වටිනා රත්තරන් කුඩු (Gold Power) තොගයක් නීතිවිරෝධී ලෙස සඟවාගෙන ගෙන පැමිණි ගුවන් මගියෙකු
අද (13) දින පස්වරුවේ කටුනායක ගුවන් තොටුපොළ පැමිණීමේ පර්යන්තයේ දී රේගු නිලධාරීන් විසින් අත්අඩංගුවට ගෙන තිබෙනවා.
මොහු මීගමුව ප්‍රදේශයේ පදිංචි 37 හැවිරිදි ව්‍යාපාරිකයෙක්.
ඔහු ඩුබායි සිට ඉන්දියාවේ මුම්බායි නුවර වෙත පැමිණ, එතැන් සිට අද දින පස්වරු 12.10 ට ඉන්ඩිගෝ ගුවන් සේවයේ 6E – 1185 දරණ ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
මොහු හැද සිටි කළිසමේ බැඳ තිබූ ඉන පටිය තුළ පැකට් ලෙස සකස් කර සගවා ගෙන මෙම රත්තරන් කුඩු මෙරටට රැගෙනවිත් තිබුණා.
එම පුද්ගලයා සන්තකයේ තිබී රත්තරන් කිලෝ ග්‍රෑම් 01 යි ග්‍රෑම් 460 ක් රේගු භාරයට ගෙන තිබෙනවා.
ඒ අනුව මෙම පුද්ගලයා රේගු අත්අඩංගුවේ තබාගෙන මේ පිළිබඳ වැඩිදුර විමර්ශන කටයුතු සිදු කරමින් පවතින බවයි අප වාර්තාකරු සඳහන් කරන්නේ.
