ශ්රී ලංකා නාවික හමුදාව විසින් ඊයේ (25) සිය භාරයට ගැනුණු කිලෝග්රෑම් 200කට අධික හෙරොයින් තොගය ගෙන්වූ ‘ජාකොබ් පුතා’ බහුදින ධීවර යාත්රාවේ හිමිකරු මෙරටින් පලා යාමට උත්සාහ කිරීමේ දී අත්අඩංගුවට ගෙන තිබෙනවා.
ඊයේ රාත්රියේ සැකකරු මාලදිවයින බලා හොර රහසේ පලා යාමට සැලසුම් කර පැමිණ ඇත්තේ සිය යාත්රාවේ ගෙනා හෙරොයින් තොගය ආරක්ෂක අංශ විසින් අත්අඩංගුවට ගනු ලැබූ පුවත සැලවීමත් සමග බවයි වාර්තා වන්නේ.
මෙම සැකකරු ඊයේ රාත්රියේ දී ම කටුනායක ගුවන් තොටුපොළ වෙත පැමිණ ඇති බවත්, එහි අවසාන ආරක්ෂක කවුළුව ද පසුකර යමින් සිටියදී ගුවන් තොටුපොළ පොලිස් මත්ද්රව්ය නාශක අංශයේ නිලධාරීන් පිරිසක් විසින් අත් අඩංගුවට ගනු ලැබූ බවත් අප ගුවන් තොටුපොළ වාර්තාකරු සඳහන් කළා.
වර්ණකුලසූරිය ඇන්ඩර්සන් ඉන්දික ප්රනාන්දු නමැති මොහු මීගමුව – පළගතුරය ප්රදේශයේ පදිංචි 38 හැවිරිදි ව්යාපාරිකයෙක්.
ඊයේ රාත්රී 08.35 ට කටුනායක ගුවන් තොටුපොළෙන් මාලදිවයින බලා පිටත්ව යාමට සූදානම් වී තිබූ එමිරේට්ස් ගුවන් සේවයේ ඊ.කේ.- 653 දරන යානයට පිවිසීම සඳහා යි; ගුවන් තොටුපොළ වෙත පැමිණ ඇත්තේ.
සියලුම ගුවන් සේවා නිෂ්කාශන කටයුතු නිමා කර ගුවන් යානයට පිවිසෙන අවසාන ආරක්ෂක කවුළුව වෙත පැමිණෙමින් සිටියදී සැකකරුව අත්අඩංගුවට ගැනුණා.
අත්අඩංගුවට ගත් මෙම ව්යාපාරිකයා මේ වනවිට (26) වැඩිදුර විමර්ශන සදහා කොළඹ පොලිස් මත්ද්රව්ය නාශක අංශයේ මූලස්ථානය වෙත රැගෙන ගොස් තිබේ .
හෙරොයින් තොගය සමග අත්අඩංගුවට ගත් බහුදින ධීවර යාත්රාව අද උදෑසන ගාල්ල වරාය වෙත ශ්රී ලංකා නාවික හමුදාව විසින් රැගෙන විත් පොලිස් මත්ද්රව්ය නාශක අංශයේ නිලධාරීන් වෙත භාර දී තිබෙනවා.
