හිටපු අමාත්ය ජොන්ස්ටන් ප්රනාන්දු මහතා අත්අඩංගුවට ගෙන අධිකරණයට ඉදිරිපත් කරන ලෙසට වරෙන්තු නිකුත් කර තිබෙනවා.
අල්ලස් කොමිසම ගොනු කර තිබෙන නඩුවකට පෙනී නොසිටීම හේතුවෙන් හිටපු අමාත්යවරයාව අත්අඩංගුවට ගන්නා ලෙසටයි කොළඹ මහාධිකරණය නියෝග කර ඇත්තේ.
මේ අතර දින ගණනාවක් සැඟවී සිටි බවට සමාජයේ කතාබහක් මතුකළ හිටපු පාර්ලිමේන්තු මන්ත්රී ජොන්ස්ටන් ප්රනාන්දු මහතා අද (23) පෙරවරුවේ කොළඹ අපරාධ පරීක්ෂණ දෙපාර්තමේන්තුව වෙත පැමිණියා.
ඒ ඔහුට අයත් යැයි පැවසෙන කොළඹ ප්රසිද්ධ තරු පහේ හෝටල් සංකීර්ණයක රථ ගාලේ නවතා තිබී සොයාගත් මෙරට දී එකලස් කරන ලද BMW වර්ගයේ මෝටර් රථයක් මෝටර් රථ ප්රවාහන දෙපාර්තමේන්තුවේ ලියාපදිංචි නොකර තිබියදී සොයා ගැනීම සම්බන්ධයෙන් ප්රකාශයක් ලබා දීම සඳහා යි.
මෙම සිද්ධිය සම්බන්ධයෙන් තමන්ව අත්අඩංගුවට ගැනීම වළක්වාලමින් අතුරු තහනම් නියෝගයක් නිකුත් කරන ලෙසට ද හිටපු අමාත්යවරයා සිය නීතිඥවරයෙකුගේ මාර්ගයෙන් අභියාචනාධිකරණයට අභියාචනයක් ද ඉදිරිපත් කළා.
එම අභියාචනය ඊයේ (22) පස්වරුවේ විභාගයට ගැනුණු විට හිටපු අමාත්යවරයාගේ නීතිඥවරයා අධිකරණයට දැනුම්දුන්නේ සිය සේවාදායකයා අද දිනයේ දී අපරාධ පරීක්ෂණ දෙපාර්තමේන්තුව වෙත ප්රකාශයක් ලබාදීමට යාමට සූදානම් බවයි.
මෙවන් පසුබිමකදියි කොළඹ මහාධිකරණය විසින් හිටපු අමාත්යවරයාව අත්අඩංගුවට ගන්නා ලෙසට නියෝගයක් නිකුත් කරනු ලැබුවේ.