අපරාධ පරීක්ෂණ දෙපාර්තමේන්තුව භාරයේ රඳවා සිටි ප්රබල පෙළේ අපරාධකරුවෙකු වන නඳුන් චින්තක වික්රමරත්න නොහොත් “හරක් කටා” නමැත්තා එම දෙපාර්තමේන්තුව බාරයෙන් මුදා ගැනීමට කළ උත්සාහයක් අසාර්ථකවීමෙන් අනතුරුව ඉන්දියාවට පලා ගොස් සිටියදී අත්අඩංගුවට ගත් රවිඳු සංදීප නමැති කොස්තාපල්වරයා ඉන්දියාවේ සැඟව සිටි කාලය තුළ මෙරට රාජ්ය ආරක්ෂාවට තර්ජනයක් වන ආකාරයේ කටයුතුවල නිරතව ඇති බවට ලද තොරතුරක් අනුව ඒ පිළිබඳ ව විධිමත් විමර්ශනයක් ආරම්භ කර ඇති බව ත්රස්ත විමර්ශන ඒකකය අද (18) කොළඹ අතිරේක මහේස්ත්රාත් පසන් අමරසේන මහතා වෙත දන්වා සිටියා.
සැකකාර හිටපු පොලිස් කොස්තාපල්වරයා ඉන්දියාවේ සැඟව සිටින කාලය තුළ ශ්රී ලංකාවේ රාජ්ය ආරක්ෂාවට තර්ජනයක් වන ආකාරයේ කටයුතු වල නිරතව ඇති බවට තොරතුරු හෙළි වී ඇති බවට ඉන්දීය බුද්ධි අංශ විසින් මෙරට බුද්ධි අංශ වෙත කරන ලද දැනුම්දීමක් අනුව එම විමර්ශන ආරම්භ කර ඇති බව ද විමර්ශන කොට්ඨාසයයේ නිලධාරීන් අධිකරණය හමුවේ පැවසුවා.
මෙම සැකකාර පොලිස් කොස්තාපල්වරයා අපරාධ පරීක්ෂණ දෙපාර්තමේන්තුවේ සේවයෙහි යෙදී සිටිය දී එහි රඳවා සිටි හරක් කටා නමැත්තාට 2023 සැප්තැම්බර් මස 10 දින එම දෙපාර්තමේන්තුවෙන් පලා යාමට අනුබල දී ඇති බවත් එය අසාර්ථක වීමෙන් අනතුරුව ඔහු රහසිගතව ඉන්දියාව වෙත පලා ගොස් සැඟව සිටියදී ත්රස්ත විමර්ශන කොට්ඨාසය මගින් පසුගියදා ඔහු ඉන්දියාවේදී අත්අඩංගුවට ගෙන මෙරටට රැගෙන ආ බව ද විමර්ශන නිලධාරීන් අධිකරණයට දැන්වූවා.
හරක් කටා නමැත්තාට අපරාධ පරීක්ෂණ දෙපාර්තමේන්තුව භාරයෙන් පලායාමට අනුබලදීම සම්බන්ධයෙන් සැකකාර කොස්තාපල්වරයා ඇතුළු තිදෙනෙකුට එරෙහිව නීතිපතිවරයා කොළඹ මහාධිකරණය හමුවේ අධිචෝදනා 22 ක් යටතේ නඩු පවරා ඇති බවද විමර්ශන නිලධාරීන් අධිකරණයට දන්වා සිටියා.
විමර්ශන නිලධාරින් අධිකරණයට දැක්වූ කරුණු සලකා බැලූ මහේස්ත්රාත්වරයා වහාම සිද්ධිය පිළිබඳව විමර්ශනයක් පවත්වා එහි ප්රගතිය අධිකරණයට වාර්තා කරන ලෙසට නියෝග කළා.
