මෙරට සිය සේවා කාලය අවසන් කිරීමට නියමිත ශ්රී ලංකාවේ කියුබානු තානාපති ඇන්ඩ්රෙස් මාර්සෙලෝ ගොන්සාලෙස් ගැරිඩෝ ඊයේ (14) කතානායක වෛද්ය ජගත් වික්රමරත්න හමුවුණා.
මෙම අවස්ථාවට පාර්ලිමේන්තු මහලේකම් කුෂානි රෝහණදීර ද සහභාගීව සිටියා.
මෙහිදී තානාපති ගොන්සාලෙස් ගැරිඩෝ, ශ්රී ලංකාවේ වසර හතරහමාරක සේවා කාලය තුළ තමාට සහ ඔහුගේ දූත පිරිසට ලබා දුන් සහයෝගය සහ ආගන්තුක සත්කාරය වෙනුවෙන් කතානායකවරයාට සිය කෘතඥතාව පළ කළා.
විශේෂයෙන් දසවැනි පාර්ලිමේන්තුව සඳහා පසුගියදා පිහිටවනු ලැබූ ශ්රී ලංකා – කියුබානු පාර්ලිමේන්තු මිත්රත්ව සංගමය හරහා දෙරට අතර ද්විපාර්ශ්වික සබඳතා තවදුරටත් ශක්තිමත් කිරීමේ හැකියාව සහ වැදගත්කම ඔහු අවධාරණය කර සිටියා.
සිය මෙහෙවර සාර්ථකව නිම කිරීමට හැකිවීම පිළිබදව කතානායකවරයා විසින් තානාපතිවරයාට සුබ පැතුම් එක්කළ අතර, දෙරට අතර මිත්රත්වය සහ සහයෝගීතාවය ශක්තිමත් කිරීම සඳහා තානාපතිවරයාගේ කැපවීම ඇගයීමට ලක් කළා.
ශ්රී ලංකාව සහ කියුබාව අතර දිගුකාලීන මිත්රත්වය සිහිපත් කළ කතානායකවරයා, සහයෝගය අවශ්යවූ අවස්ථාවලදී කියුබාව සැමවිටම ශ්රී ලංකාව වෙනුවෙන් පෙනී සිටි බවත්, ද්විපාර්ශ්වික සබඳතා ශක්තිමත් කළ බවත් සඳහන් කර සිටියා.
මෙම දිගුකාලීන රාජ්ය තාන්ත්රික සබඳතා තවදුරටත් වැඩිදියුණු කිරීම සඳහා ශ්රී ලංකාවේ කැපවීම ඔහු මෙහිදී අවධාරණය කළා.
ශ්රී ලංකාවේ වෛද්ය ක්ෂේත්රයට කියුබාව ලබාදී ඇති සහයෝගය පිළිබඳව ද කතානායකවරයා සිය කෘතඥතාව පළ කරනු ලැබුවා.
වෛද්ය වෘත්තිකයෙකු ලෙස සිය අත්දැකීම් සිහිපත් කරමින් ඔහු කියා සිටියේ ශ්රී ලංකාවේ සේවය කළ කියුබානු වෛද්යවරුන්ගේ මනුෂ්යත්වය, කැපවීම සහ සේවය ප්රශංසනීය බවයි.
ශ්රී ලංකාවේ කියුබානු ආයෝජන වැඩි කිරීම සඳහා ආරාධනා කළ කතානායකවරයා, කෘෂිකාර්මික ක්ෂේත්රයේ පුළුල් තාක්ෂණික සහයෝගීතාව වර්ධනය කිරීමේ හැකියාව ද පෙන්වා දුන්නා.
