විවිධ මත්ද්‍රව්‍ය රැගෙන ඊයේ (12) දින හැටන් මාර්ගය ඔස්සේ ශ්‍රී පාද වන්දනාවේ පැමිණි 14 දෙනෙකු සැකපිට අත්අඩංගුවට ගත් බව හැටන් කොට්ඨාස භාර පොලිස් අධිකාරි ප්‍රදිප් වීරසේකර මහතා පැවසුවා.
මත්ද්‍රව්‍ය රැගෙන ශ්‍රී පාද වන්දනාවේ පැමිණෙන පිරිස් අත්අඩංගුවට ගැනීමට හැටන් දුම්රිය ස්ථානය ඇතුළු ශ්‍රී පාදස්ථානයට පිවිසෙන මාර්ගවල මෙහෙයුම් දියත් කළ බවත්, එම මෙහෙයුමේ දී සැකපිට මොවුන් ව අත්අඩංගුවට ගැනීමට හැකි වූ බව ද පොලිසිය ප්‍රකාශ කළ බවයි දසත ප්‍රාදේශීය වාර්තාකරු සඳහන් කළේ.
සැකපිට අත්අඩංගුවට ගත් 14 දෙනා කොළඹ ඇතුළු දිවයිනේ විවිධ ප්‍රදේශවල පදිංචිකරුවන් බවත්, එම සැකකරුවන් අවුරුදු 25-35 වයස් කාණ්ඩවල පසුවන අය බවත්, ඔවුන් ව හැටන් මහේස්ත්‍රාත්වරයා වෙත ඉදිරිපත් කිරීමට පියවර ගෙන ඇති බව ද පොලිසිය සඳහන් කළා.
මේ අතර 2024 -2025 වර්ෂය සඳහා ශ්‍රී පාද වන්දනා වාරය ආරම්භ වූ 2024 උඳුවප් පොහෝ දින සිට 2025 මැදින් පෝ දින දක්වා හැටන් මාර්ගය ඔස්සේ හෙරොයින්, අයිස්, කුෂ්, නීතිවිරෝධි දුම්වැටි ඇතුළු විවිධ මත්ද්‍රව්‍ය රැගෙන පැමිණි 393 දෙනෙකු සැකපිට අත්අඩංගුවට ගෙන හැටන් මහේස්ත්‍රාත් අධිකරණය වෙත ඉදිරිපත් කර දඩ මුදල් පැමිණ වූ බවයි වාර්තා වන්නේ.
මෙම සැකකරුවන් බොහොමයක් බස්නාහිර පළාත තුළ වෙසෙන්නන් බව ද පොලිසිය පවසනවා.
