අනියම් සබඳතාවක් මුල්කරගෙන ඇති වූ ආරවුලක් හේතුවෙන් සැමියාගේ පහරදීමෙන් කාන්තාවක් ජිවිතක්ෂයට පත්වී තිබෙනවා.
අද මෙලෙස ඝාතනයට ලක්වී ඇත්තේ උඩුනුවර වෙලම්බඩ ප්රදේශයේ පදිංචි 24 හැවිරිදි එක් දරු මවක්.
ඇය තම සැමියා සමග මහියංගනය ප්රදේශයේ පදිංචිව සිට ඇති අතර බිරිඳ එම ප්රදේශයේ දී ඇතිකරගත් අනියම් සබඳතාව හේතුවෙන් සැමියා එහි පදිංචිය වෙනස් කර ඊයේ (5) බිරිඳ සමඟ වෙලම්බඩ ප්රදේශයේ පදිංචියට පැමිණ තිබෙනවා.
එහා බිරිඳගේ දෙමව්පියන්ගේ නිවස වන අතර එහි සිට ඇත්තේ මෙම අඹු සැමි යුවළ පමණයි.
මහියංගණය ප්රදේශයේ සිට පැමිණි අවස්ථාවේ සිට අද (06) උදෑසන අට පමණ වන තෙක් බිරිඳ ඇයගේ ජංගම දුරකථනයේ රැඳී සිට ඇති අතර අවුරුදු එකහමාරක් වූ දරුවාට කිරි සෑදීම පවා පමා වීම හේතුවෙන් සැමියා එම දරුවාට කිරි සාදා දුන් බව ද ඔහු පොලිසියට ප්රකාශ කර තිබෙනවා.
අනියම් සබඳතාවය හේතුවෙන් බිරිඳ ජංගම දුරකථනයේ රැඳී සිටින බව දැන ගත් සැමියා ඒ පිළිබඳව විමසීමේ දී ඔවුන් අතර වූ බහින්බස් වීමේ දී සැමියා මුළුතැන්ගේ තිබූ දර කැබැල්ලකින් බිරිඳට පහරදී ඇතැයි සඳහන්.
ඉන් බරපතළ තුවාල ලැබූ ඇය එම ස්ථානයේම මිය ගොස් ඇති බවයි පොලිසිය ප්රකාශ කළේ.
මෙම සිද්ධිය සම්බන්ධයෙන් තොරතුරු වාර්තා වූ පොලිසිය එම ස්ථානයට යන විටත් 28 හැවිරිදි සැමියා නිවසේම රැඳී සිට ඇති අතර ඔහු අත්අඩංගුවට ගෙන තිබෙනවා.
මියගිය කාන්තාවගේ සහෝදරයකු විදේශ රටක සිට එවන මුදල්වලින් ඔවුන් ඉඩමක් ගෙන මහියංගන ප්රදේශයේ නිවසක් ද ඉදි කරමින් සිට ඇති බව සඳහන්.
සොහොයුරා කොරියාවේ සිටින අතර මෙම කාන්තාවගේ සැමියා ද කොරියන් විභාගය සමත්ව කොරියාවට යාමට සූදානමින් සිට බව ද හෙළිවී තිබෙනවා.
සිද්ධිය වූ ස්ථානයට ස්ථානීය පරීක්ෂණාගාර නිලධාරීන් ද පැමිණ සිටි අතර ගම්පොල වැඩබලන මහේස්ත්රාත් විසින් මහේස්ත්රාත් පරීක්ෂණය සිදු කර තිබෙනවා.
සිද්ධිය සම්බන්ධයෙන් පොලිස් පරීක්ෂණ ක්රියාත්මකයි.
