මෙරට තුළ සේවය කිරීම සඳහා පළපුරුදු සම්බාහන චිකිත්සකවරියන් විදේශීය රටවලින් ගෙන්වා ගැනීමට ශ්රී ලංකා සංචාරක සංවර්ධන අධිකාරියේ ලියාපදිංචි හෝටල් සඳහා අවසරය ලබාදීමට තීරණය කර තිබෙනවා.
ශ්රී ලංකාව තුළ පළපුරුදු සම්බාහන චිකිත්සකවරියන් නොමැතිවම හේතුවෙන් මෙම තීරණය ගත් බවයි එම අධිකාරිය සඳහන් කළේ.
මෙරටට පැමිණෙන විදේශීය සංචාරකයින් බොහෝ පිරිසක් මෙම සම්බාහන චිකිත්සක ක්රියාවලිය බලාපොරොත්තු වූ නමුත් ඒ සඳහා පළපුරුදු කාන්තාවන් සහ පිරිමි පාර්ශවයන් නොමැති වීම ගැටළුවක්ව තිබෙනවා.
ඒ, හේතුවෙන් ප්රධානපෙළේ හෝටල් ආශ්රිතව ඇති සම්බාහන මධ්යස්ථාන රැසක් වසා දමා ඇති බවයි හෝටල් හිමියන් සංචාරක සංවර්ධන අධිකාරියට පවසා ඇත්තේ.
ඒ, අනුව ප්රධාන පෙළේ හෝටල් හිමිකරුවන් විසින් කරනු ලැබූ ඉල්ලීමකට අනුව මෙම අවසරය ලබාදුන් බවයි ශ්රී ලංකා සංචාරක සංවර්ධන අධිකාරියේ අධ්යක්ෂ ජනරාල් උපාලි රත්නායක සඳහන් කළේ.
දැනට ශ්රී ලංකාව තුළ සම්බාහන චිකිත්සකවරියන් සඳහා දේශීයව සහ විදේශීයව සංචාරකයින්ගේ විශාල ඉල්ලුමක් ඇති අතර, ඒ සඳහා පළපුරුදු සම්බාහන චිකිත්සකවරියන් හෝ පුහුණු කිරීමේ මධ්යස්ථානයක්ද නොමැති වීම නිසා සංචාරක හෝටල් ක්ෂේත්රය තුළ අර්බුදයක් නිර්මාණය වී ඇති බව ඔහු පෙන්වා දෙනවා.
මීට පෙර ආයුර්වේද දෙපාර්තමේන්තුව හරහා NVQ සහතිකය යටතේ සම්බාහන චිකිත්සකවරියන් බඳවා ගැනීමට සූදානම් වුවත් ආයුර්වේද වෛද්යවරුන්ගේ සංගම් දැඩි විරෝධය දැක්වීම නිසා එය අත්හිටුවීමට සිදු වූ බව අධ්යක්ෂ ජනරාල්වරයා සඳහන් කළා.
මේ වන විට ශ්රී ලංකා සංචාරක සංවර්ධන අධිකාරියේ (SLTDA) සුපිරි හෝටල් ඇතුළු හෝටල් 469 ක සංඛ්යාවක් ලියාපදිංචි වී ඇති අතර, ඔවුන්ගේ අවශ්යතාවය මත සම්බාහන චිකිත්සකවරියන් විදේශීය රටවලින් මෙරටට ගෙන්වා ගැනීමේ හැකියාව ඒ අනුව පවතිනවා.
ඒ, සඳහා වසරක වීසා කාලයක් ලබාදීමට සංචාරක සංවර්ධන අධිකාරිය සූදානම් බවද එම අධිකාරියේ අධ්යක්ෂ ජනරාල්වරයා වැඩිදුරටත් සඳහන් කළා.
