සංවර්ධන ලොතරැයි මණ්ඩලයේ හිටපු සභාපති චන්ද්‍රවංශ පතිරාජ මහතාට එරෙහිව පවරා තිබූ නඩුවේ පැමිණිල්ල වෙනුවෙන් සාක්ෂි ලබාදීම සඳහා ලබන නොවැම්බර් මස 29 වැනිදා අධිකරණය හමුවේ යළි පෙනී සිටින ලෙසට කොළඹ මහාධිකරණ විනිසුරු ආ.එස්. සපුවිඳ මහතා නියෝග කර තිබෙනවා.
අද (24) පෙරවරුවේ මෙම නියෝගය පාර්ලිමේන්තු මන්ත්‍රී විජිත හේරත් මහතාට සිදු කළ බවයි දසත අධිකරණ වාර්තාකරු පැවසුවේ.
අධිකරණය විසින් නිකුත් කරන ලද සිතාසි නියෝග අනුව විජිත හේරත් මහතා අද අධිකරණය හමුවේ පෙනී සිටියා.
සිය සේවාදායකයාට අද විශේෂ කටයුතු කිහිප්‍යක යෙදී ඇති බැවින් පෞද්ගලික හේතූන් සලකා වෙනත් දිනයක පැමිණිල්ල වෙනුවෙන් සාක්ෂි ලබාදීමට අවසර ලබාදෙන ලෙස විජිත හේරත් මහතා වෙනුවෙන් පෙනී සිටි නීතිඥ නාමල් රාජපක්ෂ මහතා කළ ඉල්ලීම සලකා බැලූ විනිසුරුවරයා නඩු විභාගය එදින දක්වා කල් තැබීමට ද නියෝග කළා.
දූෂණ විරෝධී සංවිධානය විසින් කරන ලද පැමිණිල්ලක් සලකා බැලූ අල්ලස් හෝ දූෂණ විමර්ශන කොමිෂන් සභාව 2012 වර්ෂයේ මැයි මස 15 වැනිදා හා ඊට ආසන්න කාලයේ දී සංවර්ධන ලොතරැයි මණ්ඩලයේ සභාපතිවරයා ලෙස කටයුතු කරමින් සිටියදී සැපයීමට අදාළ කොන්ත්‍රාත් ලබාදීමේ දී සිදු වූයේ යැයි කියන දූෂණයක් පිළිබඳ ව චෝදනා නගමින් හිටපු සභාපති චන්ද්‍රවංශ පතිරාජ මහතාට එරෙහිව එම නඩුව පවරා තිබෙනවා.
සාක්ෂිකාර විජිත හේරත් මහතා වෙනුවෙන් පෙනී සිටි නීතිඥවරයා කළ ඉල්ලීමට විත්තිකරු වෙනුවෙන් පෙනී සිටි ජ්‍යේෂ්ඨ ජනාධිපති නීතිඥ කාලිංග ඉන්ද්‍රතිස්ස මහතා ඊට විරුධත්වයක් නොදැක්වූවා.
අල්ලස් හෝ දූෂණ විමර්ශන කොමිෂන් සභාව වෙනුවෙන් නියෝජ්‍ය අධ්‍යක්ෂ ජනරාල් අසිත ඇන්තනී මහතා පෙනී සිටි අතර නීතිඥ සුනිල් වටගල මහතා සමග නීතිඥ නාමල් රාජපක්ෂ මහතා පෙනී සිටියා.
නීතිඥ නෙරංජන් ඊරියගොල්ල හා නීතිඥ අජිත් වික්‍රමසිංහ යන මහත්වරුන් සමග ජ්‍යේෂ්ඨ ජනාධිපති නීතිඥ කාලිංග ඉන්ද්‍රතිස්ස මහතා විත්තිය වෙනුවෙන් පෙනී සිටි බවයි අධිකරණ වාර්තාකරු පැවසුවේ.
