සංචාරය කරන්න හොඳම දූපත් අතරට ශ්‍රී ලංකාවත්

සංචාරක වෙබ් අඩවියක් වන Big 7 Travel මගින් ශ්‍රී ලංකාව මේ වසරේ සංචාරය කිරීමට ලොව හොඳම රටවල් අතරින් එකක් ලෙස නම් කර තිබෙනවා.

2023 වසරේ ප්‍රධාන සිදුවීම්, නව හෝටල් සහ ආපනශාලා විවෘත කිරීම් මෙන්ම 2023 වසරේ දී සංචාරයක් වඩාත් විශේෂ කිරීමට බැඳී සිටින විශේෂ අවස්ථා සැලකිල්ලට ගනිමිනුයි ‘2023 දී ලෝකයේ හොඳම දූපත් 50’ (‘ The 50 Best Islands in the World in 2023’) ලැයිස්තුව සම්පාදනය කර ඇත්තේ.

සංචාරක වෙබ් අඩවිය විසින් ප්‍රකාශයට පත් කරන ලද ලැයිස්තුවට අනුව, බහමාස් යනු 2023 දී ඕස්ට්‍රේලියාවේ ටස්මේනියාව සහ ඉන්දුනීසියාවේ රාජා අම්පට් දූපත්වලට වඩා සංචාරය කිරීමට හොඳම දූපතයි.

ශ්‍රී ලංකාව එම ලැයිස්තුවේ 13 වැනි ස්ථානයට පත්ව තිබෙනවා.

විරෝධතා, ආර්ථික අර්බුද සහ වසංගතය හේතුවෙන් ශ්‍රී ලංකාව වසර කිහිපයක සිට සංචාරක කර්මාන්ත පද්ධතියෙන් ඉවත්ව සිටියද, දැන් එහි දොරටු විවර වී ඇති බවත් ශ්‍රී ලංකාව නැරඹීමට දහසක් හේතු තිබෙන බවයි වෙබ් අඩවිය පෙන්වා දෙන්නේ.

ඔවුන් පවසන්නේ සංචාරකයින්ට මිත්‍රශීලී මිනිසුන්, රසැති ආහාර, නිමක් නැති වෙරළ සහ පෞරාණික නටබුන් සුන්දර දිවයිනේදී අත්විඳිය හැකි බවයි.

පැය කිහිපයක් ඇතුළත වතුකරය, අලි ඇතුන් පිරුණු වනජීවී උද්‍යාන, වසර දහස් ගණනක් පැරණි නටඹුන් සහ නිමක් නැති රන්වන් වැලි තීරු නැරඹීමට සංචාරකයන්ට හැකිවනු ඇති බවයි බිග් 7 ට්‍රැවල් වෙබ් අඩවිය පවසන්නේ.

මෙම රටවල් ලැයිස්තුවට අනුව, කැනරි දූපත්, ස්පාඤ්ඤය, ලන්කාවි, මැලේසියාව, මාලදිවයින, බාලි, ඉන්දුනීසියාව සහ සීෂෙල්ස් වැනි ගමනාන්තවලට ඉහළින් ශ්‍රී ලංකාව ශ්‍රේණිගත කර තිබෙනවා.