මහනුවර ප්රදේශයේ හෝටලයක නවාතැන් ගෙන සිටි පාකිස්ථාන ජාතික යුවළකගේ මුදල් පසුම්බියෙන් ඩොලර් 900ක මුදලක් සොරකම් කිරීමේ චෝදනා මත එම හෝටලයේ සේවකයෙකු අත්අඩංගුවට ගෙන තිබෙනවා.
සැකකරු ඊයේ (14) මෙම පාකිස්ථාන යුවළ නවාතැන් ගෙන සිටි කාමරය පිරිසිදු කිරීමට ගිය අවස්ථාවේ මුදල් සොරාගෙන ඇති බවටයි පොලිස් පරීක්ෂණ මගින් අනාවරණය වී ඇත්තේ.
කොළඹ ප්රදේශයේ සංචාරයක නිරතව සිට මහනුවර දක්වා පැමිණි වෑන් රථයේ රියදුරාට ලබාදීම සඳහා වෙන්කර තිබූ ඩොලර් 900ක මුදල සැකකාර හෝටල් සේවකයා විසින් සොරා ගෙන ඇති බව සඳහන්.
රියදුරා අදාළ මුදල ලබා ගැනීමට පැමිණි අවස්ථාවේ මුදල් පසුම්බියේ තිබූ මුදල එහි නොතිබීම නිසා පාකිස්ථාන යුවළ ඒ පිළිබඳ හෝටල් කළමනාකාරීත්වය දැනුවත් කර තිබෙනවා.
පසුව මහනුවර පොලිසියේ සංචාරක පොලිස් ඒකකයට සිද්ධිය දැනුම් දීමෙන් පසු නිලධාරීන් කණ්ඩායමක් සිදු කළ පරීක්ෂණවලින් අනතුරුවයි සැකකරු අත්අඩංගුවට ගෙන ඇත්තේ.
සැකකරු මීට පෙර ද තරු පන්තියේ හෝටල් කිහිපයක සේවය කරමින් සිටිය දී මුදල් සොරකම් කළ බවට චෝදනා ලබා ඇති අයෙක් බව ද සඳහන්.
අදාළ මුදල් සොයා ගැනීමෙන් පසු සැකකරු මහනුවර අධිකරණයට ඉදිරිපත් කිරීමට පොලිසිය පියවර ගෙන තිබෙනවා.
ඒ වනවිට පාකිස්ථාන ජාතික යුවළ කොළඹ බලා පිටත්ව ගොස් තිබූ අතර අධිකරණ නියෝග මත අදාළ මුදල ඔවුන්ට බාර දීමට පොලිසිය පියවර ගනු ලැබුවා.
පැමිණිල්ල කිරීමෙන් පසු පොලිසිය වහාම ක්රියාත්මක වී සැකකරු අත්අඩංගුවට ගෙන තම මුදල් සොයා දීමට කටයුතු කිරීම පිළිබඳව අදාළ යුවළ පොලිසියට විශේෂ ස්තූතියක් පළකර තිබෙනවා.
