දුම්රියෙන් ගමන් කිරීමට දෙස් විදෙස් සංචාරකයන්ගෙන් ඇති ඉහළ ඉල්ලුම හේතුවෙන් හෙට (10) දිනයේ සිට නානුඔය සිට ඇල්ල දක්වා අලුතින් ඔඩිසි දුම්රියක් ධාවනයට එක්කරන බව දුම්රිය සාමාන්‍යාධිකාරී ජේ.අයි.ඩි. ජයසුන්දර පවසනවා.
දුම්රිය දෙපාර්තුමේන්තුවේ මිලියන 02ක ප්‍රතිපාදන යටතේ හැටන් – සාත්තු නිවාස මාර්ගයේ ඉදිකළ දුම්රිය ආරක්ෂක ගේට්ටුව ජනතා අයිතියට පත් කිරීමේ අවස්ථාවට එක්වෙමින් ඔහු මේ බව සඳහන් කළා.
සාමාන්‍යාධිකාරීවරයා මෙහිදී වැඩිදුරටත් සඳහන් කර සිටියේ මෙම දුම්රියට අධික ඉල්ලුමක් පැවතිය හොත් තවත් මෙවැනිම ඔඩිසි දුම්රියක් ධාවනයට එක්කරන බවයි.
මේ අතර දුම්රිය ප්‍රවේශපත්‍ර කලින් වෙන්කර ගැනීමේ දී මීට පෙර සිදුවූ අක්‍රමිකතාවයන් වළක්වාලීමට මේ වනවිට පියවර ගෙන තිබීම හේතුවෙන් ඕනැම මගියෙකුට දුම්රිය ප්‍රවේශපත්‍ර කලින්වෙන්කර ගැනීමට මේ වනවිට අවස්ථාව පවතින බවයි ඔහු පැවසුවේ.
එමෙන්ම තුන්වන පන්තියේ ආසන වෙන්කර ගැනීම ඇතැම් ප්‍රදේශවල ක්‍රියාත්මකවන බවත්, එය දිවයින පුරා ක්‍රියාත්මක කිරිම සම්බන්ධයෙන් සැලසුම් සකස් කරන බව ද ඔහු මෙහිදී පැවසුවා.
