ශීත ඍතුව එළඹීමත් සමග ම ස්විට්සර්ලන්තයේ සුරීච් නුවර සිට නව ගුවන් සේවාවක , පළමු මංගල ගුවන් යානය (Inogaral Flight) අද (01) දින උදෑසන කටුනායක ගුවන් තොටුපොළ වෙත පැමිණියා.
දසත ගුවන්තොටුපොළ වාර්තාකරු පැවසුවේ; මෙම ප්රථම මංගල ගුවන් ගමන සඳහා ඊඩ්ල්වයිස් ගුවන් සේවය විසින් එයාර් බස් ඒ. 330 වර්ගයේ ගුවන් යානයක් යොදවා තිබූ බවයි.
ජල ආචාර (Water Salute) පවත්වා පිළිගැනීමට කටුනායක ගුවන් තොටුපොළ බලධාරීන් මෙම අවස්ථාවේ පියවර ගෙන තිබුණා.
අද උදෑසන 09.20ට ඊඩ්ල්වයිස් ( edelweiss ) ගුවන් සේවයේ ඩබ්ලිව්.කේ.- 68 මෙම ගුවන් යානය තුළ ව්යාපාරික පන්තියේ ගුවන් මගීන් 17 දෙනෙකු සහ පිරිමැසුම්දායක පන්තියේ ගුවන් මගීන් 221 දෙනෙකු සමග ගුවන් යානා කාර්යය මණ්ඩලය ලෙස තවත් 13ක් වශයෙන් 251 දෙනෙකු කටුනායක ගුවන් තොටුපොළ වෙත පැමිණ සිටියා.
සුරීච් නුවර සිට ඍජු ගුවන් ගමනක යෙදෙමින් සතියේ සෑම සිකුරාදා දිනකම කටුනායක ගුවන් තොටුපොළ වෙත පැමිණෙන මෙම යානය එදිනම උදෑසන 10.05 ට මාලදිවයින මාලේ නුවර ඔස්සේ ආපසු සූරීන් නුවර බලා කටුනායක ගුවන් තොටුපොළෙන් පිටත්ව යාමට නියමිතයි.
මෙම ගුවන් සේවා යානා එළඹෙන 2025 වසරේ ජනවාරි මස සිට සතියකට දින දෙකක් වශයෙන්, සිකුරාදා සහ ඉරිදා දිනවල සුරීච් නුවර සිට කටුනායක ගුවන් තොටුපොළ වෙත පැමිණීමට නියමිත බවත් වාර්තා වනවා.
මෙම ශීත ඍතු ගුවන් සේවයේ ගුවන් යානා එළඹෙන 2025 වසරේ මැයි මාසය තෙක් ක්රියාත්මක කිරීමට නියමිතයි.
