ශ්‍රී ලංකා හමුදා නිලධාරීන් පුහුණු කිරීම සඳහා පාකිස්තානයේ අඛණ්ඩ සහයෝගය ලබා දෙන බවට සහතික වී තිබෙනවා.
ඒ පාකිස්තානයේ ඒකාබද්ධ මාණ්ඩලික ප්‍රධානීන්ගේ කමිටුවේ සභාපති ජනරාල් සාහිර් ෂම්ෂාඩ් මිර්සා මෙරට ආරක්ෂක ලේකම් හමුවී කළ සාකච්ඡාවේදී යි.
පාකිස්ථාන හමුදා ප්‍රධානියා ආරක්ෂක මූලස්ථාන සංකීර්ණයේ සංචාරයක නිරත වූ අතර, ආරක්ෂක ලේකම් කමල් ගුණරත්න සමඟ පැවති හමුවකදී, ශ්‍රී ලංකාව සිය ආර්ථික අර්බුදයෙන් ගොඩ ඒම සඳහා දරන උත්සාහය ද අගය කර තිබෙනවා.
හමුදා ආධාර තවත් ඉහළ නැංවීම සඳහා පාකිස්තාන හමුදාවේ පූර්ණ සහයෝගීතාවය ද සංචාරයට පැමිණි පකිස්ථාන ජෙනරාල්වරයා සහතික වූ බව සඳහන්.
කලාපීය රටවල් දෙක අතර දිගුකාලීන මිත්‍ර සබඳතා සිහිපත් කළ ආරක්ෂක ලේකම්වරයා, හමුදා සහයෝගීතාවය සඳහා ශක්තිමත් හමුදාවක් පවත්වාගෙන යාමේ වැදගත්කම ද ප්‍රකාශ කළ අතර, පසුගිය කාලය තුළ පකිස්තානය ලබාදුන් නොමද සහයෝගයට කෘතඥතාව පළ කළා.
හිටපු ජනාධිපති, ජෙනරාල් පර්වේස් මුෂාරෆ්ගේ අභාවය සම්බන්ධයෙන් එහි පැමිණි දූත පිරිස වෙත සිය ශෝකය ප්‍රකාශ කිරීමට ද ඔහු කටයුතු කර තිබෙනවා.
හමුවෙන් අනතුරුව, එම අවස්ථාව සනිටුහන් කරමින් ආරක්ෂක නිලධාරීන් දෙදෙනා අතර සමරු තිළිණ හුවමාරුවක් ද සිදු වුණා.
