දසවැනි පාර්ලිමේන්තුව සඳහා ශ්රී ලංකා – ජර්මානු පාර්ලිමේන්තු මිත්රත්ව සංගමයේ සභාපති ධුරයට අධිකරණ හා ජාතික ඒකාබද්ධතා අමාත්ය නීතිඥ හර්ෂණ නානායක්කාර තේරී පත්ව තිබෙනවා.
මෙම සංගමය දසවැනි පාර්ලිමේන්තුව සඳහා ස්ථාපිත කිරීමේ රැස්වීම ජුනි 05 වන දින පාර්ලිමේන්තු පරිශ්රයේදී කතානායක ජගත් වික්රමරත්නගේ ප්රධානත්වයෙන් පැවැත් වුණා.
එම රැස්වීමේ දී, ශ්රී ලංකා – ජර්මානු පාර්ලිමේන්තු මිත්රත්ව සංගමයේ ලේකම් ධුරයට පාර්ලිමේන්තු මන්ත්රීනී නීතිඥ චමින්ද්රානි කිරිඇල්ල තේරී පත් වුණා.
රැස්වීම අමතමින් කතානායකවරයා සඳහන් කළේ, ජර්මනිය දිගු කලක සිට ශ්රී ලංකාවේ වටිනා සංවර්ධන හවුල්කරුවෙකු ලෙස, සංහිඳියාව, පෞද්ගලික අංශයේ සංවර්ධනය, සාමය ගොඩනැගීම සහ අධ්යාපනය වැනි ක්ෂේත්රවල විශාල සහයෝගයක් ලබාදෙන බවයි.
දෙරට අතර පවතින දිගු කාලීන සහයෝගීතාව ඔහුගේ ප්රශංසාවට ලක් වුණා.
මෙහිදී අදහස් දක්වමින් අභිනවයෙන් පත්වූ සභාපති අමාත්ය නීතිඥ හර්ෂණ නානායක්කාර පවසා සිටියේ දෙරටෙහි ව්යවස්ථාදායකයන් අතර සම්බන්ධතාවය ශක්තිමත් කිරීම සඳහා මෙම සංගමය හරහා වැදගත් කාර්යභාරයක් ඉටු කිරීමට හැකිවනු ඇති බවයි.
ශ්රී ලංකාව සහ ජර්මනිය අතර ද්විපාර්ශ්වික සබඳතා තවදුරටත් වැඩිදියුණු කිරීමට සහ අන්යෝන්ය අවබෝධය වර්ධනය කිරීමට එක්ව කටයුතු කරන ලෙස අභිනවයෙන් තේරී පත් වූ ලේකම් පාර්ලිමේන්තු මන්ත්රී නීතිඥ චමින්ද්රානි කිරිඇල්ල සියලුම සාමාජික මන්ත්රීවරයන්ගෙන් ඉල්ලා සිටියා.
