ශක්තිමත් බවට කිරුළු පැළඳු ටාජ්

ඉන්දියාවේ විශාලතම ආගන්තුක සත්කාරක සමාගම වන ඉන්දියන් හෝටල් සමාගම (IHCL) අඟහරුවාදා නිවේදනය කළේ එහි “නිරූපී සන්නාමය” Taj නැවත වරක් Brand Finance විසින් ලොව ශක්තිමත්ම හෝටල් සන්නාමය ලෙස අභිෂේක ගන්වා ඇති බවයි.

ඔවුන් මෙම ජයග්‍රහණය අත්පත් කරගත්තේ තෙවැනි වරට වීමත් විශේෂත්වයක්.

ලොව ප්‍රමුඛතම සන්නාම තක්සේරු උපදේශන ආයතනය විසින් ලොව ශක්තිමත්ම හෝටල් සන්නාම වාර්තාව ‘හෝටල් 50 – 2024’ වාර්ෂික වාර්තාව ලොව පුරා ඇති වටිනාම සහ ශක්තිමත්ම හෝටල් සන්නාම හඳුනාගනු ලබනවා.

Brand Finance හි Hotel 50 – 2024 වාර්තාවට අනුව, මේ වසරේ දී සන්නාම වටිනාකම ඩොලර් මිලියන 545 දක්වා සියයට 45කින් වැඩි වීමත් සමඟ Taj ලොව ශක්තිමත්ම හෝටල් සන්නාමය බවට පත්ව තිබෙනවා.

එහි වැඩි දියුණු කරන ලද සන්නාම ශක්ති දර්ශකය (BSI) ලකුණු 100න් 92.9 ක් AAA+ ශ්‍රේණිගත කිරීමක් ලබා ගත් අතර එය Brand Finance විසින් පිරිනමන ඉහළම සන්නාම ශක්ති ශ්‍රේණිගත කිරීම ද වනවා.

Taj ලොව දෙවන වේගයෙන් ම වර්ධනය වන සන්නාමය ලෙස ද හඳුනාගෙන ඇති අතර ලොව ශක්තිමත්ම හෝටල් සන්නාමය බවට නම් කෙරුණු පළමු ඉන්දීය සන්නාමය ද වනවා.

Tata සමූහ ව්‍යාපාරයේ නිර්මාතෘ Jamsetji Tata විසින් සංස්ථාපිත කරන ලද සමාගම, 1903 දී බොම්බායේ එහි පළමු හෝටලය – The Taj Mahal Palace විවෘත කළා.

IHCL සතුව ලොව පුරා මහද්වීප 4ක; රටවල් 13ක සහ සංවර්ධනය වෙමින් පවතින හෝටල් 99ක් ඇතුළුව හෝටල් 322ක් හිමියි.

ඉන්දියන් හෝටල් සමාගම (IHCL) වෙළෙඳපොළ ප්‍රාග්ධනීකරණය අනුව ඉන්දියාවේ විශාලතම සත්කාරක සමාගමද වනවා.