විදෙස් තරුණියකට හදිකරන්න ගිය කල්පිටියේ තුනක් අත්අඩංගුවට

ස්පාඤ්ඤ ජාතික තරුණියකට ලිංගික අතවර කිරීමට උත්සහ කර පසුව ඇයට පහර දුන්නැයි යන චෝදනා මත තරුණයින් තිදෙනෙක් කල්පිටිය පොලිසිය මඟින් අත්අඩංගුවට ගෙන තිබෙනවා.

සංචාරක හෝටලයක පැවති සාදයක් අතර තුරයි විදේශීය තරුණිය මෙම සිදුවීමට මුහණ දී ඇත්තේ.

සංචාරයක් සඳහා තම පෙම්වතා සමඟ මෙරටට පැමිණ ඇති තරුණිය කල්පිටිය, කන්දකුලිය ප්‍රදේශයේ හෝටලයක නවාතැන්ගෙන සිට තිබෙනවා.

එහි දී ඉකුත් 30 වනදා රාත්‍රී වෙනත් හෝටලයක පැවති සාදයකට සහභාගී වූ බවත්, එහි දී සැකකරුවන් ඇයට ලිංගික අතවර කිරීමට උත්සහ කර ඊට විරුද්ධවීම නිසා ඔවුන් තමාට පහර දුන් බවත් විදෙස් ජාතික තරුණිය පොලිසියට පැමිණිලි කර ඇති බවයි වාර්තා වන්නේ.

ඊයේ (31) දින කල්පිටිය පොලිසියට ලද මෙම පැමිණිල්ලට අනුව සැකකරුවන් අත්අඩංගුවට ගැනීමට කටයුතු කර තිබෙනවා.

සැකකරුවන් කල්පිටිය , කන්දකුලිය ප්‍රදේශයේ පදිංචි වයස අවුරුදු 23 සහ 39වන වියේ පසුවන්නන් බවයි වාර්තා වන්නේ

අත්අඩංගුවට ගත් සැකකරුවන් පුත්තලම මහේස්ත්‍රාත් අධිකරණය වෙත ඉදිරිපත් කිරීමට නියමිත අතර කල්පිටිය පොලිසිය සිද්ධිය සම්බන්ධයෙන් වැඩිදුර විමර්ශන සිදුකරනු ලබනවා.