මැදපෙරදිග කලාපයේ රටවල් නියෝජනය කරන මාධ්යවේදීන් පිරිසක් පාර්ලිමේන්තුවේ අධ්යයන චාරිකාවක නිරත වී තිබෙනවා.
ඔවුන් පසුගියදා (27) පාර්ලිමේන්තුවේ මෙලෙස අධ්යයන චාරිකාවක නිරත වුණා.
ඔවුන් වෙනුවෙන් ශ්රී ලංකා පාර්ලිමේන්තුව පිළිබඳ දැනුවත් කිරීමේ වැඩසටහනක් ද සංවිධානය කොට තිබුණු බවයි පාර්ලිමේන්තු සන්නිවේදන දෙපාර්තමේන්තුව විසින් නිකුත් කළ නිවේදනයේ දැක්වෙන්නේ.
පාර්ලිමේන්තුවේ ව්යුහය සහ කාර්යභාරය, නීති සම්පාදනය ක්රියාවලිය, පාර්ලිමේන්තු විවාද කිරීමේ ක්රමවේද සහ පාර්ලිමේන්තු කාරක සභාවල කාර්යභාරය සහ පාර්ලිමේන්තු කටයුතු මහජනතාව වෙත ගෙන යාම ආදිය පිළිබඳව මෙහිදී දීර්ඝ වශයෙන් සාකච්ඡා කර තිබෙනවා.
විශේෂයෙන්ම දකුණු ආසියානු සන්දර්භය තුළ රටවල් අතර ද්විපාර්ශ්වික සහ බහුපාර්ශ්වික සබඳතා ක්රියාත්මක වන ආකාරය සහ තිරසාර සංවර්ධන ඉලක්ක මෙන්ම අනෙකුත් ජාත්යන්තර එකඟතා සාක්ෂාත් කර ගැනීම කෙරෙහි ශ්රී ලංකා පාර්ලිමේන්තුව අවධානය යොමු කරන ආකාරය පිළිබඳව ද මෙහිදී විදෙස් ජනමාධ්යවේදීන් දැනුවත් කර ඇති බවයි වාර්තා වන්නේ.
කුවේට් රාජ්යය, ඊජිප්තුව, ඇල්ජීරියාව, මොරොක්කෝ රාජධානිය ඇතුළු රටවල් ගණනාවක් නියෝජනය කරමින් ජනමාධ්යවේදීන් රැසක් මෙම අවස්ථාවට සහභාගී වූ බව එම නිවේදනයේ සඳහන්.
ජාත්යන්තර මාධ්යවේදීන් සඳහා වූ මධ්යස්ථානය (ICFJ) විසින් මෙම චාරිකාව සංවිධානය කර තිබූ අතර, ශ්රී ලංකා පුවත්පත් ආයතනය (SLPI) ඒ සඳහා සහයෝගය දක්වා තිබෙනවා.
මෙම අවස්ථාවට පාර්ලිමේන්තුවේ මහ ලේකම් කුෂානි රෝහණදීර, සහකාර මහ ලේකම් හංස අබේරත්න, අධ්යක්ෂ, වැඩ බලන අධ්යක්ෂ එම්. ජයලත් පෙරේරා, සහ ශ්රී ලංකා පුවත්පත් ආයතනයේ ප්රධාන විධායක නිලධාරී කුමාර් ලෝපේස් යන මහත්ම මහත්මීන් එක්ව සිටියා.
