අධිකරණයෙන් විදෙස් ගමන් තහනම් නියෝග හතරක් තිබියදී ඩුබායි රාජ්‍යයට පළා ගොස් නැවත පැමිණි මැණික් ව්‍යාපාරිකයෙකු කළුතර විශේෂ අපරාධ විමර්ශන ඒකකය මගින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ බේරුවල ප්‍රදේශයේ පදිංචි 37 හැවිරිදි මැණික් ව්‍යාපාරිකයෙක්.
වටිනා මැණික් ගල් ලබාගෙන අගරු චෙක්පත් ලබාදී රුපියල් කෝටි තුනකට ආසන්න මුදලක් වංචා කිරීම සම්බන්ධයෙන් විභාග වන නඩු හතරක් සඳහා අපරාධ පරීක්ෂණ දෙපාර්තමේන්තුව සහ කළුතර විශේෂ අපරාධ විමර්ශන ඒකකය වෙතින් සැකකරුට එරෙහිව විදෙස් ගමන් තහනම් නියෝග හතරක් ලබාගෙන තිබී ඇතැයි සඳහන්.
ඔහු රටින් පළා ගොස් සිටි බවට පොලිසිය තහවුරු කරගෙන සිටි නමුත් කළුතර අධිකරණයේ විභාග වන නඩුවකට නීතිඥයකු මාර්ගයෙන් ඉදිරිපත්ව සිට තිබෙනවා.
අධිකරණ භූමියේදී සැකකරු හඳුනාගෙන පසුව කළ විමර්ශනවලින් පසුවයි පොලිස් කණ්ඩායමක් විසින් ඔහු අත්අඩංගුවට ගෙන ඇත්තේ.
සැකකරු ඩුබායි රාජ්‍යයට පළා ගොස් සිට පසුගිය 15 වනදා දිවයිනට පැමිණ ඇති බවට හෙළිවී තිබෙනවා.
විදෙස් ගමන් තහනම් හතරක් පනවා තිබියදී ඔහු රටින් පළා ගියේ කෙසේ ද යන්න සම්බන්ධයෙන් වෙනම විමර්ශනයක් සිදුකරන බවයි පොලිසිය සඳහන් කළේ.
අත්අඩංගුවට ගෙන ඇති සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතයි.
