ලොව විශාලතම ආගමික උත්සවය අද ඇරඹේ – උත්සවයට බැතිමතුන් කෝටි 04ක්

වැඩිම බැතිමතුන් පිරිසක් සහභාගීවන ලොව විශාලතම ආගමික උත්සවය වන මහා කුම්භමේලා උත්සවය වෙනුවෙන් ඉන්දියාව මේ වනවිට සූදානම් වනවා.

අද (13) දිනයේ සිට දින 45ක් පැවැත්වෙන මෙම උත්සවය වෙනුවෙන් ඉන්දිය රජය විසින් ඇමරිකානු ඩොලර් මිලියන 812ක් වියදමක් දරනවා.

සෑම වසර 12ක වරක් ඉන්දියාවේ උත්තර් ප්‍රදේශ්හි ප්‍රයග්‍රාජ් හි පැවැත්වෙන මහා කුම්භමේලා උත්සවය වෙනුවෙන් අද (13) සිට කෝටි හතරක පමණ බැතිමතුන් පිරිසක් පැමිණෙනු ඇති බවයි වාර්තා වන්නේ.

මෙම උත්සවයට පැමිණෙන බැතිමතුන්ගේ ආරක්ෂාව සඳහා උත්තර් ප්‍රදේශ් ප්‍රාන්ත පොලිසිය විශේෂ ආරක්‍ෂිත වැඩ පිළිවෙලක් ක්‍රියාත්මක කර තිබෙනවා.

ඒ, අනුව ආරක්ෂක නිලධාරීන් 40,000ක් ආරක්ෂාව සඳහා යොදවා ඇති අතර, AI සක්‍රීය කැමරා 328ක් ඇතුළුව CCTV කැමරා 2,751 ද ස්ථාපිත කර ඇති බවයි ඉන්දීය මාධ්‍ය වාර්තා කළේ.

එමෙන්ම ආරක්ෂක වළලු හතක ආරක්ෂක සැලැස්මක් මේලා ප්‍රදේශය වන්දනාකරුවන්ගේ ආරක්ෂාව සඳහා සකසා ඇති බව සඳහන්.

ඊට අමතරව උත්සවය පැවැත්වෙන සම්පූර්ණ ප්‍රදේශයම වාහන තහනම් කලාපයක් ලෙස ප්‍රකාශයට පත්කර තිබෙනවා.

එමෙන් පැය 24 පුරා නිරීක්ෂණය සඳහා හා අධි තාක්‍ෂණික ඩ්‍රෝන යානා 20ක් යෙදවීමට ද ආරක්ෂක අංශ කටයුතු කර ඇති බවයි වාර්තා වුණේ.

අදින් ඇරඹෙන මෙම උත්සවයට පැමිණෙන වන්දනාකරුවන්ට නවාතැන් ගැනීම සඳහා බලධාරීන් කූඩාරම් 150,000 ක් ගංගා ඉවුරු දෙපස පිහිටුවා තිබෙනවා.

ඊට අමතරව සනීපාරක්ෂාව වෙනුවෙන් සනීපාරක්ෂක සේවකයින් 15,000ක් සහ තාවකාලින වැසිකිළි 150,000ක් පමණ පිහිටුවා ඇති බව සඳහන්.

සෑම වසර 12 කට වරක් සිදුවන “මහා” කුම්භය වඩාත් සුබදායක යැයි සලකනු ලබන අතර, මෙහිදී ගංගා, යමුනා සහ සරස්වතී නදියට සංගම් නදිය එකතු වෙන ස්ථානයට පැමිණෙන බැතිමතුන් එම ස්ථානයෙන් ස්නානය කරනු ලබනවා.

එලෙස සිදුකිරීමෙන් පව් දුරුවන බවත්, ජීවන හා මරණ චක්‍රයෙන් මිදීම ලබාදෙන බව බැතිමතුන් විශ්වාස කරනවා.