ලංකා ගමනාගමන මණ්ඩලයේ ගිරිඋල්ල ඩිපෝවට අයත් බස් රථයක සේවය කරන කොන්දොස්තරවරයෙකුට පුද්ගලික බස් රථ කොන්දොස්තරවරයෙකු විසින් පහරදීමේ සිද්ධියක් සම්බන්ධයෙන් විමර්ශනයක් ආරම්භ කර තිබෙනවා.
දංකොටුව පොලීසිය පැවසුවේ ඊයේ පස්වරු 06ට පමණ දංකොටුව – දළුවෙල ප්‍රදේශයේ දී මෙම පහරදීම සිදු වී ඇති බවයි.
පහරකෑමට ලක්ව ඇත්තේ දසනායක මුදියන්සේලාගේ මධුසංඛ දසනායක නම් අයෙක්.
ගිරිඋල්ල ඩිපෝවට අයත් බස් රථයක් ඊයේ සවස 6.55 ට මීගමුවෙන් කුරුණෑගල බලා ගමන් ආරම්භ කර ඇති අතර, එම බස් රථය අතරමග දී කාර්මික දෝෂයකට ලක් ව තිබෙනවා.
පසුව බස් රථයේ රියදුරු සහ කොන්දොස්තර විසින් බස් රථයේ ඇති වූ කාර්මික දෝෂය යථා තත්ත්වයට පත් කරගෙන නැවත කුරුණෑගල බලා ගමන් කිරීමට පටන් ගෙන ඇති බවයි වාර්තා වන්නේ.
ඒ අතරතුර පසුපසින් මීගමුවේ සිට කුරුණෑගල බලා ධාවනය වෙමින් තිබූ පුද්ගලික බස් රථයක් ද පැමිණ තිබෙනවා.
පහරදීම සිදු කර ඇත්තේ එම බස් රථයේ කොන්දොස්තරවරයා බවටයි පොලීසිය විසින් අනාවරණය කරගෙන ඇත්තේ.
ලංගම බස් රථය ප්‍රමාද වී ධාවනය කිරීම පහරදීමට හේතුව බවයි වාර්තා වන්නේ.
කෙසේවෙතත් පහර දුන් සැකකාර කොන්දදොස්තරවරයා අත්අඩංගුවට ගෙන නොමැති අතර සිද්ධිය සම්බන්ධයෙන් දංකොටුව පොලිස් විමර්ශන ක්‍රියාත්මකයි.
